દેશની સૌથી ઝડપી ટ્રેન 'વંદે ભારત એક્સપ્રેસ' માટે ટિકિટનું બુકિંગ શરૂ

દેશની સૌથી ઝડપી ટ્રેન વંદે ભારત એક્સપ્રેસમાં હવે તમે મુસાફરી કરી શકો છો. રેલવે મંત્રી પીયુષ ગોયલે કહ્યું કે વંદે ભારત એક્સપ્રેસ મુસાફરી માટે તૈયાર છે. મુસાફરો 17 ફેબ્રુઆરી બાદ ટિકિટ irctc.co.in પર બૂક કરાવી શકે છે. દેશની અત્યાધુનિક તથા વિશ્વસ્તરીય ટ્રેન વંદે ભારત એક્સપ્રેસ મુસાફરી માટે તૈયાર થવા જઇ રહી છે.

દેશમાં જ બનેલી પ્રથમ સેમી હાઇસ્પીડ ટ્રેનમાં મુસાફરી માટે મુસાફરોએ 17 ફેબ્રુઆરી તથા ત્યારબાદ http://www.irctc.co.in પર ટિકિટ બૂક કરાવી શકે છે.

દિલ્હી-વારાણસી મુસાફરી માટે એસી ચેર કારનું ભાડું 1760 રૂપિયા, જ્યારે એક્ઝિક્યૂટિવ ક્લાસનું ભાડું 3310 રૂપિયા છે. તો રિટર્ન મુસાફરીમાં ચેયર કારની ટિકિટનું ભાડું 1700 રૂપિયા અને એક્ઝિક્યૂટિવ ક્લાસનું ભાડું 3,260 રૂપિયા રહેશે.

ભારતીય રેલવેએ વંદે ભારતનું ભાડું મંગળવારે જાહેર કર્યું હતું. આ ટ્રેનનું એસી ચેયરકારનું ભાડું શતાબ્દીની એસી ચેયરકારના બેસ ફેયરથી 1.4 ટકા વધુ રખાયું છે.

એક્ઝિક્યૂટિવ ક્લાસ શ્રેણીનું ભાડું શતાબ્દીના એક્ઝિક્યૂટિવ ક્લાસના ભાડાથી 1.3 ટકા વધુ રાખવામાં આવ્યું છે. ભાડામાં રિઝર્વેશન ચાર્જ, સુપરફાસ્ટ ચાર્જ, કેટરિંગ ચાર્જ તથા જીએસટી સામેલ છે.

ભારતીય રેલવેની સૌથી મોસ્ટ અવેટેડ ટ્રેન 18 એટલે કે વંદે ભારત એક્સપ્રેસનું ઉદ્ધાટન 15 ફેબ્રુઆરી થશે. જો કે સામાન્ય જનતા માટે આ ટ્રેન 17 ફેબ્રુઆરીથી ઉપલબ્ધ થશે. પરંતુ તેના પહેલા રેલવે પોતાના તરફથી તમામ તૈયારી કરી રહ્યું છે.

વંદે ભારત એક્સપ્રેસ 15 ફેબ્રુઆરીએ નવી દિલ્હી રેલવે સ્ટેશનથી વારાણસી માટે રવાના થશે. વડાપ્રધાન નરેન્દ્ર મોદી આ ટ્રેનને લીલી ઝંડી દેખાડી રવાના કરશે.