PHOTOS: 20 કિલોગ્રામ ઓછું વજન, દાદા જેવી હેરકટ...Kim Jong Unનો નવો લૂક જોઈને લોકો થયા અચંભિત

ઉત્તર કોરિયા (North Korea)ના તાનાશાહ કિમ જોંગ ઉન (Kim Jong Un) પોતાના નવા લુક અને વજનને લઈને ચર્ચામાં છે. લાંબા સમય બાદ તેઓ ફરી એક વખત સૈન્ય પરેડ (Military Parade) દરમિયાન જોવા મળ્યા હતા. નેશનલ ટેલિવિઝન પર પરેડ દરમિયાન કિમ જોંગ ખૂબ પાતળા (Kim Jong Un Weight Loss) દેખાતા હતા. તેમણે પોતાના દાદા કિમ ઈલ સુંગ (Kim Il Sung)ની જેમ વાળ કપાવ્યા હતા. ઉલ્લેખનીય છે કે, કિમ ઇલ સુંગ ઉત્તર કોરિયાના સ્થાપક હતા.

ઉત્તર કોરિયાએ દેશના 73મા સ્થાપના દિવસ નિમિત્તે તેની રાજધાનીમાં 'ગુઝ સ્ટેપ' (ખાસ પ્રકારના કદમતાલ) કરતા સૈનિકો અને લશ્કરી સાધનોની પરેડ કાઢી હતી. 'કોરિયન સેન્ટ્રલ ન્યૂઝ એજન્સી'ના અહેવાલ અનુસાર લડાકુ વિમાનોએ 'કિમ ઈલ સુંગ સ્ક્વેર' ઉપર ખાસ રચનામાં ઉડાન ભરી હતી.

આ પરેડ ગુરુવારે પ્રસારિત કરવામાં આવી હતી. આ દરમિયાન હથિયારોનું પ્રદર્શન તો નહોતું કરાયું, પરંતુ લોકોનું ધ્યાન પરેડ કરતાં વધુ કિમ જોંગ ઉન તરફ હતું. તસવીરો જોઈને લાગે છે કે કિમે લગભગ 20 કિલો વજન ઘટાડી દીધું છે.

લાઈટ કલરનો સૂટ પહેરીને તાનાશાહ લશ્કરી પરેડ જોવા આવ્યો હતો. આ દરમિયાન કિમે ભાષણ નહોતું આપ્યું, પરંતુ લોકોની સામે જોઈ તેઓ હાથ હલાવી અભિવાદન કરતા અને હસતા જોવા મળ્યા હતા. રાજધાની પ્યોંગયાંગના સેન્ટ્રલ કિમ ઈલ સુંગ સ્ક્વેર પર સુરક્ષા દળોએ એક કલાકથી વધુ સમય સુધી માર્ચ કરી હતી.

ઉલ્લેખનીય છે કે, વર્ષોથી કિમ જોંગ ઉનની તબિયત અંગે અટકળો ચાલી રહી હતી. જેની પાછળનું કારણ કીમનું વધારે વજન અને ધૂમ્રપાન છે. કિમનો પરિવાર હૃદયરોગ સામે લડવાનો લાંબો ઈતિહાસ ધરાવે છે. આવી સ્થિતિમાં જ્યારે પણ કિમ જોંગ ઉન લોકોની નજરથી ગાયબ થઈ જાય છે. લોકો તેમની બીમારીનું અનુમાન લગાવવા લાગે છે.

છેલ્લા કેટલાક મહિનાઓથી એવા અહેવાલો આવ્યા હતા કે, કિમ જોંગ ઉનની તબિયત સારી નથી. તસવીરોમાં જોવા મળે છે કે કિમનું વજન ઘણું ઓછું થઈ ગયું છે અને તે લૂઝ કપડાંમાં જોવા મળે છે. કેટલીક તસવીરોમાં તેના માથાના પાછળના ભાગમાં એક રહસ્યમય કાળો ડાઘ પણ જોવા મળ્યો હતો, જેને છુપાવવાનો પ્રયાસ કરવામાં આવ્યો હતો.

માનવામાં આવે છે કે કિમ જોંગ પ્રશાસન દેશને બતાવવા માંગે છે કે, કિમ જોંગ કેવી રીતે દેશની ચિંતામાં ભળી રહ્યા છે. તાજેતરની પરેડમાં તેના વજને ફરી એક વખત લોકોનું ધ્યાન ખેંચ્યું છે.