4 રાજ્યોમાં પૂરના કારણે 100થી વધુ લોકોનાં મોત, અમિત શાહ એરિયલ સર્વે કરશે

કેરળ, કર્ણાટક, મહારાષ્ટ્ર અને ગુજરાતમાં પૂરની સ્થિતિ ગંભીર બનેલી છે. અત્યાર સુધી 136 લોકોનાં મોત થઈ ચૂક્યા છે. કેરળ ને કર્ણાટકમાં શનિવારે પૂરના કારણે સ્થિતિ ગંભીર બની ગઈ છે, ભૂસ્ખલનથી મરનારાઓની સંખ્યા 83 થઈ ગઈ છે. જ્યારે મહારાષ્ટ્રમાં ચાર લાખથી વધુ લોકોને સુરક્ષિત સ્થળે ખસેડવામાં આવ્યા છે. ગુજરાતમાં વરસાદ સાથે જોડાયેલી ઘટનાઓમાં 19 લોકોએ જીવ ગુમાવ્યા છે.

મહારાષ્ટ્રમાં અત્યાર સુધી 12 લોકોનાં મોત થયા છે. સાંગલી અને કોલ્હાપુર જિલ્લામાં જળસ્તર વધવા લાગ્યું છે. આ વિસ્તાર મહારાષ્ટ્રમાં પૂરના કહેરથી સૌથી વધુ પ્રભાવિત છે.

બીજી તરફ, કેરળના મુખ્યમંત્રી પિનારાઈ વિજયને જણાવ્યું કે, કેરળના આઠ જિલ્લાઓમાં 80 ભૂસ્ખલન સંબંધિત ઘટનાઓમાં 57 લોકોનાં મોત થઈ ચૂક્યા છે. કેરળમાં સવા લાખ લોકો વિસ્થાપિત થઈ ગયા છે. પૂર અને વરસાદની સૌથી વધુ માર વાયનાડ અને કોઝિકોડ પર પડી છે જ્યાં લગભગ 25-25 હજાર લોકો ઘરવિહોણાં બન્યા છે.

કર્ણાટકમાં ભારે વરસાદ અને પૂરનાં કારણે રેલવે ટ્રેક ધોવાઈ ગયા હતા.

મહારાષ્ટ્રના કોલ્હાપુરમાં ભારતીય નૌસેનાએ રેસ્ક્યૂ ઓપરેશન હાથ ધર્યુ હતું.

ગુજરાતના રાજકોટમાં ભારે વરસાદના કારણે અનેક રસ્તાઓ પર પાણીમાં ગરકાવ થઈ ગયા હતા.

કેન્દ્રીય ગૃહ મંત્રી અમિત શાહ આજે કર્ણાટકના પૂર પ્રભાવિત બેલગાવી વિસ્તારનું હવાઈ નિરીક્ષણ કરશે. દેશના દક્ષિણ અને પશ્ચિમના પાંચ રાજ્યોમાં પૂરનો કહેર સતત ચાલુ છે.

કર્ણાટકમાં ભૂસ્ખલનના કારણે રેલવે ટ્રેકને નુકસાન થતાં રેલ વ્યવહારને અસર થઈ હતી.