અખિલેશનું હેલિકોપ્ટર જોઈ ભડક્યો આખલો, લોકોને દોડાવી-દોડાવી, પટકી-પટકી માર્યા

ઉત્તર પ્રદેશના કન્નોજમાં ગુરૂવારે સમાજવાદી પાર્ટીની રેલીમાં એક આખલાએ આતંક મચાવ્યો. વાત જાણે એમ હતી કે, સપાના અધ્યક્ષ અખિલેશ યાદવની પત્ની ડિંપલ યાદવના ચૂંટણી વિસ્તારમાં ચૂંટણી પ્રચાર માટે અખિલેશ યાદવ અને બસપા સુપ્રિમો માયાવતી આવવાના હતા. એવામાં તેમનું હેલિકોપ્ટર લેન્ડ થાય તે પહેલા જ ત્યાં એક રખડતો આખલો પહોંચી ગયો.

આખલાને સુરક્ષાકર્મીઓએ ત્યાંથી હટાવવાની કોશિસ કરી. તેજ સમયે ગઠબંધનના નેતાઓના હેલિકોપ્ટર હેલિપેડ પર ઉતરવા લાગ્યા, જેને જોઈ આખલો ભડકી ગયો અને સભાસ્થળ પર આતંક મચાવી દીધો. આખલાએ જે પણ સામે આવે તેને પટકવાનું શરૂ કરી દીધુ.

લોકો પોતાનો જીવ બચાવવા આમ તેમ ભાગવા લાગ્યા. આ સમયે થોડા સમય માટે રેલી સ્થલ પર અશાંતી ફેલાઈ ગઈ. પોલીસ જવાનોએ આખલાને ભગાડવા કેટલીએ મહેનત કરી. જાણકારી અનુસાર, આખલાને ભગાડવામાં એક સફાઈ કર્મચારી અને પોલીસ કર્મી પણ ઘાયલ થયો છે.

ઉલ્લેખનીય છે કે, કન્નોજમાં ગટબંધન ઉમેદવાર ડિંપલ યાદવના પ્રચાર માટે રેલીનું આયોજન કરવામાં આવ્યું હતું. બસપા સુપ્રિમો માયાવતી અને ઉત્તરપ્રદેશના પૂર્વ મુખ્યમંત્રી અખિલેશ યાદવ એક સાથે જનસભા સંબોધિત કરવાના હતા. તેના માટે સભાસ્થળ પાસે હેલિપેડ બનાવવામાં આવ્યું હતું. પરંતુ નેતા આવે તે પહેલા જ આખલો ત્યાં ઘુસી ગયો.

આખલાને પકડવામાં પોલીસે ઘણી મહેનત કરી. પોલીસની સાથે કાર્યકર્તાઓ અને ફાયરની ટીમ પણ આખલાને કાબુ કરવામાં લાગી. લગભગ અડધા કલાકની મહેનત બાદ આખલાને પકડવામાં સફળતા મળી અને હેલિપેડમાંથી તેને બહાર કરવામાં આવ્યો.

અખિલેશ યાદવે કહ્યું કે, થોડા સમય પહેલા આખલો સ્થળ પર ઘુસી આવ્યો હતો. મે ડીજીપી સાહેબને ફોન કર્યો અને કહ્યું અમારી રેલીને કોઈ ખરાબ કરવા આવ્યું છે, પરંતુ તે સમજ્યા નહીં. પછી મે જણાવ્યું કે, સભામાં આખલો ઘુસી આવ્યો છે.

તમને જણાવી દઈએ કે, આ પહેલા ઉત્તર પ્રદેશના મુખ્યમંત્રી યોગી આદિત્યનાથની રેલીમાં હેલિપેડમાં આખલો ઘુસી આવ્યો હતો.