J&K: બનિહાલ ટનલ પાસે કારમાં બ્લાસ્ટ, CRPF કાફલાનો આબાદ બચાવ

જમ્મુ-કાશ્મીરમાં શ્રીનગર-જમ્મુ હાઈવે પર બનિહાલની પાસે એક કારમાં સંદિગ્ધ બ્લાસ્ટ થયો છે. બ્લાસ્ટમાં કોઈ જાનહાનિ થવાના અહેવાલ નથી.

સીઆરપીએફનો કાફલો કારથી ઘણો દૂર હતો. બ્લાસ્ટ એટલો જોરદાર હતો કે દૂર હોવા છતાંય સીઆરપીએફની એક બસને સામાન્ય નુકસાન થયું છે.

પ્રારંભિક તપાસમાં પોલીસનું કહેવું છે કે કારમાં સિલેન્ડર બ્લાસ્ટ થયો છે. જોકે, આ દરમિયાન કારનો ડ્રાઇવર ગાયબ છે.

આ બ્લાસ્ટમાં સીઆરપીએફ જવાન કે કોઈ પણ સામાન્ય નાગરિક ઇજાગ્રસ્ત થયું નથી. હાલ પોલીસે મામલાની તપાસ શરૂ કરી દીધી છે.

ઉલ્લેખનીય છે કે 14 ફેબ્રુઆરીએ પુલવામામાં જોરદાર બ્લાસ્ટ થયો હતો. આઈઈડીથી ભરેલી કાર સીઆરપીએફના કાફલાને ટકરાઈ હતી. આ આતંકી હુમલામાં 40 સીઆરપીએફ જવાન શહીદ થયા હતા.