કોરોનાના 50 લાખ કેસ: દેશ માટે એક આઘાતજનક રેકોર્ડ, જાણો 1થી 50 લાખ કેસ સુધીની સફર

નવી દિલ્હી: દેશ માટે 16મી સપ્ટેમ્બરનો દિવસ ખૂબ આઘાતજનક રહ્યો. કારણ કે આજે એટલે કે 16 સપ્ટેમ્બરના રોજ દેશમાં કોરોના વાયરસના કુલ કેસ 50 લાખને પાર થઈ ગયા. ભારત વિશ્વમાં કોરોનાથી સૌથી વધારે અસર પહોંચી હોય તેવા ત્રણ દેશમાં સામેલ છે. આ દિવસે ભારતને નામે એક આઘાતજનક રેકોર્ડ નોંધાયો છે.

16 સપ્ટેમ્બરના રોજ દેશમાં કોરોનાના કુલ કેસની સંખ્યા 50,20,360 પર પહોંચી હતી. આ સાથે દેશમાં કોરોનાના સક્રિય કેસની સંખ્યા 9,95,933 છે. જ્યારે દેશમાં અત્યાર સુધી કોરોનાથી 82,066 લોકોનાં મોત થયા છે. આ સાથે કોરોનાથી દેશમાં સાજા થનાર કે હૉસ્પિટલમાંથી રજા મેળવનારા દર્દીની સંખ્યા 39,42,361 પર પહોંચી છે.

દેશમાં પ્રથમ કેસથી લઈને 50 લાખ સુધીના કેસની સફરની વાત કરીએ તો અંતિમ 11 દિવસમાં જ દેશમાં 10 લાખ કેસનો વધારો થયો છે, જે વિશ્વમાં ક્યાંક પણ સૌથી ઝડપી નોંધાયેલા કેસ છે. દેશમાં એકથી એક લાખ સુધી કેસ પહોંચવામાં 110 દિવસ લાગ્યા હતા. જે બાદમાં કોરોનાએ રફ્તાર પકડી હતી.

અમેરિકા, બ્રાઝિલ અને ભારતમાં વિશ્વમાં સૌથી વધારે કેસ નોંધાયેલા છે. જેમાં એકથી 10 લાખ સુધી કેસ પહોંચતા કેટલા દિવસ લાગ્યા તેની વાત કરવામાં આવે તો ભારતમાં 167 દિવસ લાગ્યા હતા. જ્યારે બ્રાઝિલમાં 114 દિવસ લાગ્યા હતા અને અમેરિકામાં સૌથી ઓછા 98 દિવસ લાગ્યા હતા.

ભારત અને અમેરિકાની જો સરખામણી કરવામાં આવે તો દેશમાં છેલ્લા સાત દિવસમાં સરેરાશ 93 હજારથી વધારે કેસ નોંધાઈ રહ્યા છે. અમેરિકામાં કોરોના જ્યારે પીક પર હતો ત્યારે ત્યાં સાત દિવસની સરેરાશ 69 હજાર કેસ હતી.

ભારતમાં સૌથી વધારે અસર પહોંચી હોય તેવા પાંચ રાજ્યોની સાત દિવસની એવરેજની વાત કરવામાં આવે તો મહારાષ્ટ્રમાં 22 હજાર કેસ નોંધાયા છે. જ્યારે તામિલનાડુમાં 5,600 જેટલા કેસ નોંધાયા છે.

વિશ્વમાં મોતના પ્રમાણે અંગે વાત કરવામાં આવે તો ભારતમાં મૃત્યુદર સૌથી ઓછો 1.64 ટકા છે. અમેરિકામાં કોરોનાનો મૃત્યુદર 2.95 ટકા, જ્યારે વિશ્વની સરેરાશ 3.16 ટકા છે.