Covid-19: ભારતે કર્યા 50 લાખ ટેસ્ટ, પણ રેટિંગમાં ટૉપ-130માં પણ નહીં, નેપાળ-શ્રીલંકા આગળ
પ્રતિ લાખ વસ્તી પર ભારતે 356 ટેસ્ટ કર્યા છે અને આપણો દેશ રેટિંગમાં 138મા સ્થાને છે
નવી દિલ્હીઃ ભારતમાં કોરોના વાયરસ (Coronavirus) ઝડપથી ફેલાઈ રહ્યો છે. જૂનમાં રોજ લગભગ 8-10 હજાર નવા કેસ સામે આવી રહ્યા છે. નવા કેસ આવવા માટે બે કારણ માનવામાં આવી રહ્યા છે. પહેલા તો લૉકડાઉન જેવા તમામ ઉપાયો હાથ ધર્યા છતાંય સંક્રમણ રોકાતું નથી. બીજું, ભારત (India)એ કોવિડ-19 (COVID-19)ની તપાસ તેજ કરી દીધી છે. રોજ એક લાખથી વધુ ટેસ્ટ થઈ રહ્યા છે. દેશમાં અત્યાર સુધી 50 લાખ ટેસ્ટ થઈ ચૂક્યા છે. ભારતમાં અત્યાર સુધી 2.76 લાખ લોકો કોરોનાથી સંક્રમિત થઈ ચૂક્યા છે. તેમાંથી 7750થી વધુ લોકોનાં મોત થઈ ચૂક્યા છે.
ભારતે મંગળવાર સુધીમાં કોવિડ-19ના ટેસ્ટ કર્યા છે. તેની સાથે જ તે એવો ચોથો દેશ બની ગયો, જેણે 50 લાખથી વધુ ટેસ્ટ કર્યા હોય. પહેલા ત્રણ સ્થાન પર અમેરિકા, રશિયા અને બ્રિટન છે. અમેરિકાએ 2.18 કરોડ અને રશિયાએ 1.13 કરોડ ટેસ્ટ કર્યા છે. બ્રિટને 59 લાખ ટેસ્ટ કર્યા છે. જો કુલ ટેસ્ટના હિસાબથી જોઈએ તો ભારત, બ્રિટનની નજીક છે, પરંતુ અમેરિકા અને રશિયાથી ખૂબ પાછળ છે.
જ્યારે કોઈ દેશમાં કુલ કેસ, મોત કે તપાસનો ઉલ્લેખ કરવામાં આવે છે તો સરેરાશની વાત થાય છે. એટલે કે દેશમાં તેની વસ્તીના હિસાબથી કેટલા કેસ આવ્યા, કેટલા મોત થયા કે કેટલી તપાસ થઈ. ટેસ્ટ કે ડેથ રેટને પ્રતિ લાખ કે પ્રતિ 10 લાખ વસ્તી પર ચકાસવામાં આવે છે. તેનાથી જાણી શકાય છે કે ભારતે ભલે 50 લાખ ટેસ્ટ કરી લીધા હોય, પરંતુ ટેસ્ટ રેટમાં તે દુનિયાના ટૉપ-130 દેશોમાં પણ સામેલ નથી.
ટેસ્ટ રેટિંગમાં મોનેકો પહેલા નંબરે - વર્લ્ડઓમીટર્સ મુજબ, પ્રતિ લાખ વસ્તી પર 41,300 ટેસ્ટ કર્યા છે. બીજા નંબરે જિબ્રાલ્ટર (27,552) અને ત્રીજા નંબરે યૂએઈ (25,670) છે. આ યાદીમાં મુખ્ય દેશોમાં ડેનમાર્ક 13મા સ્થાને, સ્પેન 17મા સ્થાને, રશિયા 20મા સ્થાને, બ્રિટન 21મા સ્થાને, સિંગાપુર 27મા સ્થાને અને અમેરિકા 30મા સ્થાને છે. કોરોના મુક્ત થઈ ચૂકેલું ન્યૂઝીલેન્ડ 34મા સ્થાને છે. તેણે પ્રતિ લાખ વસ્તી પર 5,915 લોકોના ટેસ્ટ કર્યા છે.
