ભારત સિવાય અન્ય 5 દેશ પણ મનાવે છે 15 ઑગસ્ટના દિવસે પોતાની ‘આઝાદીનો ઉત્સવ’

15મી ઑગસ્ટે દેશ પોતાની આઝાદીની 74મી વર્ષગાંઠ મનાવશે. આખા દેશમાં ઉજવણીનો માહોલ હશે. આ પ્રસંગે આખા દેશમાં કાર્યક્રમ યોજાશે. 15મી ઑગસ્ટ એ ભારત જ નહીં અન્ય 5 દેશ પણ એવા છે જે પોતાની આઝાદીની ઉજવણી કરે છે. ભારતની જેમ 5 દેશનો આઝાદી દિવસ 15 ઑગસ્ટ છે. ભારત સાથે દક્ષિણ કોરિયા, નોર્થ કોરિયા, કોંગો, બહરિન અને લિકટેંસ્ટીનને 15 ઑગસ્ટે આઝાદી મળી હતી.

દક્ષિણ કોરિયા 15 ઓગસ્ટએ પોતાનો સ્વતંત્રતા દિવસ મનાવે છે. 15 ઓગસ્ટ 1945ના રોજ દક્ષિણ કોરિયાએ જાપાનથી આઝાદી મેળવી હતી. યૂએસ અને સોવિયત ફોર્સે કોરિયાને જાપાનના કબજામાંથી છોડાવ્યું હતું. આ દિવસે દક્ષિણ કોરિયાના લોકો નેશનલ હોલિડે તરીકે મનાવે છે.

દક્ષિણ કોરિયાની જેમ નોર્થ કોરિયા પણ 15 ઓગસ્ટના રોજ સ્વતંત્રતા દિવસ તરીકે મનાવે છે. બંને દેશો 15 ઓગસ્ટે 1945ના રોજ જાપાનના કબજામાંથી મુક્ત થયા હતા. નોર્થ કોરિયામાં 15 ઓગસ્ટે એ નેશનલ હોલિડે હોવાથી આ દિવસે લગ્ન કરવાની પરંપરા ચાલી રહી છે.

15 ઓગસ્ટે બહરિને પણ આઝાદી મેળવી હતી. 15 ઓગસ્ટ 1971ના દિવસે બહરિને બ્રિટનથી આઝાદી મેળવી હતી. બ્રિટિશ સૈનિકો 1960ના દશકથી બહરિન છોડવા લાગ્યા હતા પણ 15 ઓગસ્ટે બહરિન અને બ્રિટનમાં એક ટ્રીટી થઈ હતી. જે પછી બહરિને આઝાદ દેશ તરીકે બ્રિટન સાથે પોતાના સંબંધો રાખ્યા હતા.

કોંગોએ 15 ઑગસ્ટે આઝાદી મેળવી હતી. 15 ઑગસ્ટ 1960ના રોજ આફ્રિકાનો આ દેશ ફ્રાન્સની પકડમાંથી આઝાદ થયો હતો. આ પછી તે રિપબ્લિક ઓફ કોંગો બન્યો. 1880થી કોંગો પર ફ્રાંન્સનો કબજો હતો. તેને ફ્રેન્ચ કોંગો તરીકે ઓળખવામાં આવતું હતું. 1903માં તે મિડલ કોંગો બન્યું.

લિકટેંસ્ટીને 15 ઓગસ્ટ 1866ના રોજ જર્મનીથી આઝાદી મેળવી હતી. 1940થી તે 15 ઓગસ્ટના રોજ સ્વતંત્રતા દિવસ તરીકે મનાવી રહ્યો છે. આ દુનિયાનો સૌથી નાના દેશોમાંથી એક છે.