Ghazipur: બાહુબલી મુખ્તાર અંસારી પર મોટી કાર્યવાહી, માર્કેટની 17 દુકાનો જપ્ત, 10.10 કરોડનો લાગ્યો ઝાટકો

ગાઝીપુર. ઉત્તર પ્રદેશ વિધાનસભા ચૂંટણી (UP Chunav) પહેલા ફરી એકવાર બાહુબલી ધારાસભ્ય મુખ્તાર અંસારી (Mukhtar Ansari) વિરુદ્ધ યોગી સરકારે (Yogi Govt) મોટી કાર્યવાહી કરી છે. ઉત્તર પ્રદેશના ગાઝીપુર (Ghazipur)માં બાહુબલી ધારાસભ્ય મુખ્તાર અંસારી સામે મોટી કાર્યવાહી કરતા યોગી સરકારના એન્ટી માફિયા અભિયાન હેઠળ પોલીસ પ્રશાસને મુખ્તાર અંસારીની 10.10 કરોડની બેનામી સંપત્તિ જપ્ત કરી લીધી છે.

યુપી પોલીસે ગેંગસ્ટર એક્ટ હેઠળ ગાઝીપુર શહેરના મહુઆબાગ (Mahuabaugh) વિસ્તારમાં આવેલી મુખ્તાર અંસારીની માર્કેટ જપ્ત કરી લીધી છે. આ સંપત્તિ મુખ્તાર અંસારીની પત્ની અફશા અન્સારી અને પુત્ર અબ્બાસ અન્સારીના નામે છે. શહેરની વચોવચ આવેલા મુખ્તારની આ માર્કેટમાં 17 દુકાનો આવેલી છે.

જપ્તીની આ કાર્યવાહીના ભાગરૂપે પોલીસ પ્રશાસને આ તમામ દુકાનોને સીઝ કરી છે. અગાઉ આ બિલ્ડીંગના ઉપરના માળે બનેલી મુખ્તાર અંસારીની હોટેલ ગઝલને પણ પોલીસ પ્રશાસન દ્વારા તોડી પાડવામાં આવી હતી.

હાલમાં બાહુબલી ધારાસભ્ય મુખ્તાર અંસારી પર કાયદાનો સકંજો કસવામાં આવી રહ્યો છે, જેના કારણે મુખ્તાર ગેંગમાં હલચલ મચી ગઈ છે. યુપી પોલીસે એવા સમયે મુખ્તાર અંસારી વિરુદ્ધ કાર્યવાહી કરી છે, જ્યારે એવી અટકળો ચાલી રહી છે કે તે ફરીથી ચૂંટણી લડશે. હાલ તો અંસારી જેલમાં બંધ છે.