Sri Lanka Crisis : શ્રીલંકાએ વિદેશી દેવાને લઇને હાથ ઉંચા કર્યા, ભારત સહિત આ દેશોના ડૂબ્યા પૈસા

FP અનુસાર, શ્રીલંકા પર લગભગ $51 બિલિયનનું વિદેશી દેવું છે. ચીનને આમાં સૌથી વધુ નુકસાન થશે, કારણ કે તેણે સૌથી વધુ દેવું શ્રીલંકાને આપ્યું છે. શ્રીલંકાના કુલ બાહ્ય દેવામાં ચીનનો હિસ્સો લગભગ 10 ટકા છે. ચીન પછી જાપાન અને ભારતનું સૌથી વધુ દેવું શ્રીલંકા પર છે.

શ્રીલંકાએ તેના કુલ દેવાના 47 ટકા ડેટ માર્કેટમાંથી લીધા છે. ચીનનું દેવું દેશની કુલ લોનના 15 ટકા જેટલું છે. દેશમાં એશિયન ડેવલપમેન્ટ બેંકના 13 ટકા, વિશ્વ બેંકના 10 ટકા, જાપાનના 10 ટકા અને ભારતમાં 2 ટકા હિસ્સો છે.

ક્રેડિટ રેટિંગ એજન્સી મૂડીઝના અહેવાલ અનુસાર, ફેબ્રુઆરીના અંતે શ્રીલંકાની વિદેશી હૂંડિયામણની અનામત લગભગ $2 બિલિયન હતી, જે આયાતના બે મહિના કરતાં પણ ઓછી કિંમતની છે. વિદેશી હૂંડિયામણના ઓછા ભંડારને કારણે સરકારે આયાત પર પ્રતિબંધ મૂક્યો હતો. જેના કારણે દેશમાં ઈંધણ, દૂધ પાવડર જેવી જરૂરી વસ્તુઓની અછત સર્જાઈ હતી અને લોકો રસ્તા પર આવી ગયા હતા. મોંઘવારી બે આંકડામાં પહોંચી ગઈ છે.

શ્રીલંકાના નાણામંત્રી અલી સબરીએ કહ્યું હતું કે શ્રીલંકાને આગામી છ મહિનામાં ઇંધણ અને દવાઓના પુરવઠાને સરળ બનાવવા અને આર્થિક કટોકટીનું સંચાલન કરવા માટે લગભગ $3 બિલિયનની જરૂર પડશે.

2.2 મિલિયનની વસ્તી ધરાવતા શ્રીલંકામાં છેલ્લા ઘણા મહિનાઓથી સ્થિતિ ખૂબ જ ખરાબ છે. દેશમાં જીવનજરૂરી વસ્તુઓના ભાવ આસમાને પહોંચી ગયા છે. વિદેશી હૂંડિયામણની તીવ્ર અછતને કારણે પેટ્રોલ-ડીઝલની આયાત કરવામાં આવી રહી નથી. કલાકો સુધી વીજ પુરવઠો ખોરવાય છે, પેટ્રોલ પંપ પર લાંબી લાઈનો છે.

ગુસ્સે થયેલા વિરોધીઓ રસ્તા પર ઉતરી રહ્યા છે અને રાષ્ટ્રપતિ ગોટબાયા રાજપક્ષે પર દબાણ વધી રહ્યું છે. દેશની સંસદના સ્પીકરે તાજેતરમાં કહ્યું હતું કે દેશની જનતા ભૂખમરાની સ્થિતિ પર આવી ગઈ છે.

શ્રીલંકાએ ચીનને તેના દેવાને ફરીથી શેડ્યૂલ કરવાની અપીલ કરી હતી, પરંતુ ચીને તેનો સ્પષ્ટ ઇનકાર કર્યો હતો. ચીનના દેવામાં ફસાયેલા અન્ય ઘણા દેશોની આર્થિક સ્થિતિ પણ કફોડી છે. જેમાં પાકિસ્તાન, મેડાગાસ્કર, માલદીવ અને તાજિકિસ્તાનનો સમાવેશ થાય છે.