માત્ર 5 કલાકમાં પૂર્ણ થશે ઉદયપુર-અમદાવાદની મુસાફરી, પ્રવાસીઓ માણી શકશે સુંદર નજારાઓનો આનંદ

રાજસ્થાનના ઉદયપુરને (Udaipur) દેશ અને દુનિયામાં સરોવરો (City of lake)ની સાથે સાથે પર્યટન શહેર તરીકે પણ ઓળખવામાં આવે છે. જોકે અત્યાર સુધી રેલવે કનેક્ટિવિટી (Railway Connectivity)ની બાબતમાં શહેર પાછળ હતું. પરંતુ ઉદયપુર-અમદાવાદ રેલવે લાઇન ગેજ કન્વર્ઝન (Udaipur Ahmedabad Broad Gauge Conversion)ની કામગીરી 13 વર્ષ પછી પૂર્ણ થઈ છે. તે પૂર્ણ થયા બાદ આ શહેર દેશના ખૂણે ખૂણા સાથે જોડાઈ જશે. ઉદયપુર-અમદાવાદ રેલવે લાઈન (Udaipur-Ahmedabad Train)નું આખરી ઈન્સ્પેક્શન પણ કરવામાં આવ્યું હોવાનું માનવામાં આવી રહ્યું છે. આવી સ્થિતિમાં આ લાઇન પરની ટ્રેનોને ટૂંક સમયમાં મંજૂરી આપવામાં આવશે.

ઉદયપુરથી દક્ષિણ ભારત સાથે ગુજરાત થઈને જોડતો આ રેલવે ટ્રેક રેલ યાત્રીઓને પ્રકૃતિ સાથે જોડીને એડવેન્ચરનો અહેસાસ પણ કરાવશે. કારણ કે આ એક ટ્રેક હશે જે પર્વતો, નદીઓ અને જંગલો વચ્ચેથી પસાર થશે. તેણે ઘણા પુલ અને રેલ્વે ટનલને પણ પાર કરવી પડશે. ઉદયપુરથી અમદાવાદ રૂટ પર મીટરગેજ ટ્રેક પણ લગભગ છ વર્ષ પહેલા બંધ કરવામાં આવ્યો હતો. ત્યાર બાદ ઉદયપુરથી અમદાવાદ સુધી કોઇ ટ્રેન ચલાવવામાં આવી રહી ન હતી. પરંતુ હવે ટૂંક સમયમાં જ ટ્રેક પર રેલ વ્યવહાર શરૂ થવાની આશા વધી રહી છે.

રાજ્યની બીજી સૌથી મોટી ટનલ 821 મીટરની લંબાઈ સાથે ટ્રેક પર બનાવવામાં આવી છે. આશરે 2136 કરોડના ખર્ચે બનેલા આ રેલવે ટ્રેકનું ઉદ્ઘાટન 2009માં થયું હતું. પરંતુ ઘણી વખત બજેટના અભાવે ઇચ્છાશક્તિના અભાવે ધીમે ધીમે કામ શરૂ થયું હતું. પરંતુ છેલ્લા કેટલાક વર્ષોમાં આ કામમાં ગતિ લાવવામાં આવી છે અને કામ પૂર્ણ થયું છે. આ ટ્રેક પર ઉદયપુરથી અમદાવાદ સુધી કુલ 36 રેલવે સ્ટેશન હશે.

બીજી તરફ આ ટ્રેક તૈયાર કરવા માટે આધુનિક ટેક્નોલોજીનો ઉપયોગ કરવામાં આવ્યો છે. જેમાં ઇલેક્ટ્રિક ઇન્ટરલોકિંગ કરવામાં આવ્યું છે, જ્યારે ટ્રેક પર સારી સ્લીપર ડેન્સિટી સાથે કામ કરવામાં આવ્યું છે.

આપને જણાવી દઇએ કે, દર વર્ષે લાખો પ્રવાસીઓ ઉદયપુર આવે છે. ઉદયપુરમાં પ્રવાસીઓની સંખ્યા સતત વધી રહી છે. તેમાંથી 35 ટકા પ્રવાસીઓ ગુજરાતમાંથી આવે છે. આવી સ્થિતિમાં, ટ્રેન કનેક્ટિવિટી હોવાને કારણે ઉદયપુરના પર્યટનને વેગ મળશે. સાથે જ પર્યટનનો લાભ પણ રેલવે સુધી પહોંચશે. દક્ષિણ ભારતના પ્રવાસીઓ પણ ટૂંક સમયમાં ઉદયપુર પહોંચી શકશે.