ન્યૂઝીલેન્ડ: મસ્જિદમાં કરાયેલા ગોળીબારની ભયાનક તસવીરો

ઓસ્ટ્રેલિયાના ક્રાઇસ્ટચર્ચ ખાતે અલ નૂર અને બીજી એક મસ્જિદ પર કરવામાં આવેલા હુમલામાં  40થી વધારે લોકોનાં મોત થયા છે. 28 વર્ષીય ઓસ્ટ્રેલિયને શૂટઆઉટ દરમિયાન લાઇવ સ્ટ્રિમિંગ કર્યું હતું. બે મસ્જિદમાં કરવામાં આવેલા હુમલા બાદ પોલીસ ઘટનાસ્થળે પહોંચીને સ્થિતિ પર કાબૂ મેળવવાનો પ્રયાસ કર્યો હતો.

સાક્ષીઓના જણાવ્યા પ્રમાણે તેમણે ક્રાઇસ્ટચર્ચની અલ નૂર મસ્જિદમાં 50 જેટલા ગન શોટના અવાજ સંભળાયા હતા.

મસ્જિદ ખાતે જ્યારે નમાઝ પઢવામાં આવી રહી હતી ત્યારે હુમલાખોરે સેમી ઓટોમેટિક રાઇફલથી અંધાધૂંધ ગોળીબાર કર્યો હતો. આ બનાવ ઓસ્ટ્રેલિયન સમય પ્રમાણે સવારે 11.30 વાગ્યો બન્યો હતો.

આ અંગે સામે આવેલા વીડિયોમાં જોઈ શકાય છે કે એક વ્યક્તિ લોકો પર અંધાધૂંધ ગોળીબાર કરી રહ્યો છે.

પોલીસે હુમલા સંદર્ભે એક શકમંદની ધરપકડ કરી લીધી છે. જોકે, આ વ્યક્તિએ જ હુમલો કર્યો છે કે નહીં તે નક્કી થયું નથી.

હુમલા પહેલા શંકમંદે ટ્વિટર પર 87 પાનાનો એક મેનિફેસ્ટો પણ પોસ્ટ કર્યો હતો. ટ્વિટર પર તેણે 'આતંકી હુમલો' ગણાવ્યો હતો.

અલ નૂર ઉપરાંત બાજુમાં આવેલી લિન્ડવૂડ મસ્જિદમાં પણ લોકો પર ફાયરિંગ કરવામાં આવ્યું હતું.

એવા પણ રિપોર્ટ સામે આવ્યા છે કે અલ નૂર મસ્જિદથી ત્રણ કિલોમીટર દૂર એક હોસ્પિટલ બહાર પણ હુમલો કરવામાં આવ્યો હતો. એટલું જ નહીં અહીંથી એક કારમાં બોમ્બ પણ મળી આવ્યો છે.

આ બનાવ બાદ પોલીસે નજીકમાં રહેતા લોકોને ઘરમાં જ રહેવાની સલાહ આપી છે. પોલીસે આ હુમલાને ખૂબ જ ગંભીર ગણાવ્યો છે.

ન્યૂઝલેન્ડના પોલીસ કમિશ્નર માઇક બુશે કહ્યું કે, બે મસ્જિદ અને ક્રાઇસ્ટચર્ચ હોસ્પિટલ ખાતે થયેલા ગોળીબારમાં અનેક લોકો માર્યા ગયાના સમાચાર છે.

હુમલા બાદ ન્યૂઝીલેન્ડમાં રહેતા મુસ્લિમોને નમાઝ પઢવા માટે મસ્જિદમાં ન જવાની સલાહ આપવામાં આવી છે. પોલીસ કમિશ્નરના જણાવ્યા પ્રમાણે એક વ્યક્તિને કસ્ટડીમાં લઈ લેવામાં આવ્યો છે.

ન્યૂઝીલેન્ડના પ્રાઇમ મિનિસ્ટર જકિન્ડા આર્ડર્ને જણાવ્યું કે 'આ હુમલો ન્યૂઝીલેન્ડના કાળા દિવસમાંનો એક છે.'

હુુમલાખોરો હથિયારો પર તેનું નામ લખ્યું હતું.