ગૃહમંત્રીના ગઢ બહુચરાજીમાં જનતા રેડ,'એકને મારશો તો હજ્જારો અલ્પેશ ઠાકોર પેદા થશે'

બહુચરાજીઃ ક્ષત્રિય ઠાકોર સેનાના અલ્પેશ ઠાકોર દ્વારા આજે ગૃહમંત્રી રજની પટેલના ગઢ બહુચરાજીમાં દારૂબંધીનો અમલ કરવા દારૂના અડ્ડા પર જનતા રેડ કરવામાં આવી હતી. સાથે સ્વચ્છતા અભિયાન પણ હાથ ધરાયું હતું. અલ્પેશ ઠાકોર સાથે સેનાના યુવાનો તેમજ મહિલાઓ પણ જોડાઇ હતી.

અલ્પેશ ઠાકોરે બહુચરાજી માતાજીના દર્શન કર્યા બાદ ઠાકોર સેના દ્વારા જનતા રેડ સાથે સફાઈ ઝુંબેશ હાથ ધરાઈ હતી. અલ્પેશ ઠાકોર સાથે યુવાનો સવારણા લઈને જોડાયા હતા. દારૂના અડ્ડા બંધ કરો, હપ્તાખોરી બંધ કારોના નારા લગાવ્યા હતા.બહુચરાજીમાં અલ્પેશ ઠાકોર દારૂના બુટલેગરને ત્યાં પહોંચ્યા હતા. અને દારૂ ન વહેંચવા અપીલ કરી હતી. અલ્પેશ ઠાકોર સાથે ઠાકોર સમાજના યુવકો અને મહિલાઓ પણ જોડાઈ હતી.

ગૃહમંત્રીના ગઢ બહુચરાજીમાં ક્ષત્રિય ઠાકોર સેના દ્વારા જનતા રેડ કરાઇ હતી.

મારા યુવાનો પર ચોરીનો આરોપ નાંખવાની ધમકી અપાઈ રહી છે સફાઈ ઝુંબેશ સાથે અલ્પેશ ઠાકોરે આરોપ લગાવ્યો હતો કે,પોલીસ બુટલેગરોનો બચાવ કરે છે.દુષિત થયેલા યાત્રાધામોને પવિત્ર કરવા નીકળ્યો છું.મારા યુવાનો પર ચોરીનો આરોપ નાંખવાની ધમકી અપાઈ રહી છે.મને રોકવો હોય તો રોકી લો, મારવો હોય તો મારી લો.

એક અલ્પેશ ઠાકોરને મારશો તો હજ્જારો અલ્પેશ ઠાકોર પેદા થશે અલ્પેશ ઠાકોરે વધુમાં કહ્યું હતું કે,મહેસાણામાં એક હજાર કરતા વધુ દારૂના અડ્ડાઓનું લિસ્ટ આપ્યું છે.મને જેલમાં નાંખવો હોય તો નાખી દો, હું તૈયાર છું.ગુજરાતમાં હપ્તાઓનું રાજ ચાલે છે, ગાંધીનું ગુજરાત દુષિત થઇ રહ્યું છે.અલ્પેશ ઠાકોરની અગેવાનોમાં હવે જનતા રેડ થશે.'નાંખી દો મારી પર કલમ-307',એક અલ્પેશ ઠાકોરને મારશો તો હજ્જારો અલ્પેશ ઠાકોર પેદા થશે.

કાળા કાચવાળી ગાડીમાં અલ્પેશ ઠાકોર બહુચરાજી પહોંચ્યા હતા. જે કાયદાનો ભંગ કરતા નજરે પડ્યો હતો.બહુચરાજીમાં અલ્પેશ ઠાકોરે ગૃહમંત્રીને આડેહાથ લઇ જણાવ્યું હતું કે,'ગૃહપ્રધાનના ગામમાં પણ દારૂની હાટડીઓ ચાલુ છે.આજથી સમગ્ર ગુજરાતમાં દારૂના અડ્ડાઓ પર જનતા રેડ પડશે.પોલીસને ફરીથી અલ્ટીમેટમ આપી દારૂના અડ્ડા બંધ કરાવવા વિનંતી કરી હતી.

જ્યારે બીજી તરફ મહેસાણા ડીવાયએસપી રાજેશ ગઢીયાએ જણાવ્યું હતું કે, કોઈ સ્થળ પર દારૂ વેચાતો હોય તો પોલીસને જાણ કરો.પોલીસને જાણ કર્યા સિવાય રેડ કરવાની કોઈને સત્તા નથી.જો ક્યાંય દારૂ વેચાતો હોય તો અમને જાણ કરો, અમે સાથે આવીશું.કોઈ અઘટિત ઘટના બનશે તો રેડ કરનારની જવાબદારી રહેશે.