Vadodara: 24 વર્ષના છોકરોનું ટુ-વ્હીલર સ્લીપ થતા બ્રિજ પરથી નીચે પટકાયો, પ્રાણપંખેરું ઉડી ગયું

વડોદરા શહેરમાં આવેલો ફતેગંજનો બ્રિજ ફરી એકવાર જીવલેણ સાબિત થયો છે. આ બ્રિજ પર થયેલા વધુ એક અકસ્માતમાં યુવક બ્રિજ પરથી નીચે પટકાતા મોત થઈ ગયું છે. આ બ્રિજ પર પાછલા 5 વર્ષમાં ચોથી વખત અકસ્માતની ઘટના બની છે. ઘટના બન્યા આસપાસના લોકો ઘટના સ્થળ પર દોડી આવ્યા હતા અને આક્રોશ વ્યક્ત કર્યો છે.

24 વર્ષના આશાસ્પદ હર્ષ લિંબાચિયા નામના યુવકનું બ્રિજ પર ટર્નિંગ લેતી વખતે અકસ્માત સર્જાયો હતો અને અકસ્માતમાં તેનું મોત થઈ ગયું હતું. જ્યારે ટુ-વ્હીલર સાથે ટર્નિંગ લેવામાં આવી રહ્યો હતો ત્યારે અકસ્માત થતા યુવક બ્રિજની નીચે પટકાયો હતો.

હર્ષની સાથે અન્ય એક યુવક પણ હતો, પરંતુ અકસ્માતમાં હર્ષનું મોત થઈ ગયું છે જ્યારે અન્ય યુવકનો જીવ બચી ગયો છે. આ અકસ્માતની ઘટના બુધવારે મધ્ય રાત્રીએ સર્જાઈ હતી. આ ઘટના અંગે સ્થાનિક જણાવ્યું કે એક યુવક ઉપરથી નીચે પટકાયો હતો. જેનું મોત થઈ ગયું છે.

સ્થાનિક જણાવ્યું કે બુધવારે રાત્રે 12.30 વાગ્યાની આસપાસ આ દુર્ઘટના બની હતી જેમાં નીચે પડેલા યુવકનું મોત થયું હોવાની જાણ થઈ છે. આ પહેલા પણ આ રીતે બ્રિજ પરથી વાહનચાલકોની નીચે પટકાવાની ઘટના બની છે.

આ મામલે સ્થાનિકો દ્વારા રોષ વ્યક્ત કરવામાં આવી રહ્યો છે. આ પ્રકારની ઘટનાઓ વારંવાર બનવા છતાં સ્થાનિક તંત્ર દ્વારા પગલા ભરવામાં આવી રહ્યા ના હોવાનું સ્થાનિક જણાવી રહ્યા છે. સ્થાનિકે જણાવ્યું કે આ મામલે સ્થાનિક તંત્રએ યોગ્ય પગલા લેવા જોઈએ, જેથી કરીને અકસ્માતોની ઘટનાને રોકી શકાય.

24 વર્ષના હર્ષ લિંબાચિયાના કાકાએ ઘટના અંગે વાત કરતા જણાવ્યું કે, હર્ષ રાત્રે ફતેગંજ બ્રિજ પરથી આવી રહ્યો હતો, આ દરમિયાન વાહન સ્લીપ થઈ ગયું હતું અને હર્ષ નીચે પડતા તેનું મોત થઈ ગયું છે.

હર્ષના કાકાને પોતાના યુવાન ભત્રિજાને ગુમાવતા ભારે દુઃખ થઈ રહ્યું છે, તેમણે કહ્યું કે, વિકાસના કામો બધા સારા થાય છે. પરંતુ અમારી એટલી પ્રાર્થના છે કે બ્રિજની જે પાળી છે તેને થોડી ઊંચી કરવી જોઈએ જેથી કરીને અકસ્માતની ઘટના રોકી શકાય. તેમણે કહ્યું કે, દિવાલ ઊંચી હોય તો અકસ્માતમાં નાની-મોટી ઈજા થાય પરંતુ કોઈએ જીવ ના ગુમાવવો પડે.