વડોદરા : વડોદરા જિલ્લા એસઓજીની ટીમે ગઈકાલે રાત્રે છોટાઉગેપુર- ડભોઈ હાઇવે પરથી 78 કિલો ગાંજો ઝડપી પાડ્યો છે. ગઈકાલે રાત્રે પીકઅપ ડાલામાં વિવિધ સ્થળો છૂપાવેલા આ ગાંજાના પેકેટ જોઈને પોલીસ ચોંકી ગઈ હતી. પોલીસે કુલ 78 કિલો ગાંજા સાથે 9.87 લાખનો મુદ્દામાલ ઝડપી પાડ્યો છે.
બનાવની વિગત એવી છે કે જિલ્લા એસઓજીને મધ્યપ્રદેશ પાસિંગની બોલેરો પીકઅપ વાનને અટકાવતા અંદરથી ગાંજો મળી આવ્યો હતો. પોલીસે બાતમી મળી હતી કે મધ્યપ્રદેશ પાસિંગની બોલેરોમાં ગાંજો છે. પોલીસે પહેલાંથી જ વોચ ગોઠવેલાી હતી.
દરમિયાન ગઈકાલે પણસોલી ગામના બસસ્ટેન્ડ પાસે એસઓજી ફિલ્ડીંગમાં હતી ત્યારે આ ડાલું આવી ચઢ્યું હતું જેમાં અંદરે બેસેલા ડ્રાઇવર શાંતિલાલ બરડે અને નવલસીંગ નારવે અંગજડતી કરવામાં આવી હતી. આ બંનેની તપાસ કર્યા બાદ ગાંડી ચેક કરતા ગાંજાના 40 પેકેટો મળી આવ્યા હતા.
એસઓજીએ બંનેની પૂછપરછ કરતા તેમણે આ ગાંજો મહારાષ્ટ્રના ધુલિયા જિલ્લાના સાંગલી તાલુકાના મહાદેવથી મનીષ ઉર્ફે મનોજ નારચ પાસેથી લીધો હતો અને વિસનગર ખાતે રહેતાં બાબુશાહ ફકીરને આપવા જતા હોવાનું જણાવ્યું હતું. મહારાષ્ટ્રના ધુલિયાથી 547 કિલોમીટર દૂર આવેલા વિસનગરમાં માલ આપવા જઈ રહેલા આ નશાના સોદાગરને પોલીસે વડોદરા નજીકથી જ ઝડપી પાડીને નશાના સોદાગરોનો ખેલ ખલાસ કરી નાખ્યો છે.
