Vadodara: આ આર્ટિસ્ટે માતાજીના નવ સ્વરૂપોની એવી પેઇન્ટિંગ બનાવી કે જોતા લાગે સાક્ષાત થાય છે દર્શન; Photos

Nidhi Dave, Vadodara: ચૈત્ર નવરાત્રીના પર્વમાં માઈ ભક્તો ઉપવાસ, પૂજા અર્ચના તેમજ દાન - પુણ્ય કરી મા આદ્ય શક્તિની આરાધના કરતાં હોય છે. ત્યારે શહેરના રંગોળી આર્ટિસ્ટે પોતાની કલા થકી અનોખી માઇ ભક્તિ કરી છે. વડોદરા શહેર સંસ્કારી નગરી તરીકે ઓળખાય છે પરંતુ સાથે કલા નગરી પણ કહેવાય છે. તેથી અહીંના કલાકારો પોતાની ભક્તિ પોતાની કલા થકી પ્રદર્શિત કરતા હોય છે.

જેમાં વડોદરા શહેરના રંગોળી આર્ટિસ્ટ તથા સહજ રંગોળી ગ્રુપના સંચાલક કમલેશ વ્યાસ એ માતાજીની ભક્તિ માતાજીના વિવિધ સ્વરૂપોના ચિત્રો બનાવીને કરી છે.

આર્ટિસ્ટ કમલેશ વ્યાસ છેલ્લાં ઘણાં વર્ષોથી કલા થકી માતાજીની આરાધના કરે છે. તેમણે દર વર્ષની જેમ આ વર્ષે પણ ચૈત્ર નવરાત્રીના પ્રથમ દિવસથી જ મા આદ્યશક્તિના વિવિધ સ્વરૂપોને ચિત્રમાં કંડારવાનું શરૂ કર્યું હતું.

આર્ટિસ્ટ કમલેશ વ્યાસે જણાવ્યું હતું કે, હું એમ તો હું નોકરી કરું છું, પરંતુ મારી કલા મારા માટે સર્વસ્વ છે. હું કલા થકી જ મારી ભક્તિ દર્શાવું છું. નવરાત્રીના નવ દિવસ દરમિયાન - મા આદ્યશક્તિના નવ સ્વરૂપોની પૂજા થાય છે. મેં આ વર્ષે ચૈત્ર નવરાત્રીના પ્રથમ દિવસથી માતાજીના વિવિધ સ્વરુપોના પેઈન્ટિંગ્સ બનાવ્યાં છે.

જ્યારે બીજા દિવસે બ્રહ્મચારિણી, ત્રીજા દિવસે ચંદ્રઘંટા, ચોથા દિવસે કુષ્માંડા, પાંચમા દિવસે સ્કંદમાતા અને છઠ્ઠાં દિવસે કાત્યાયની, આજે સાતમા દિવસે કાલરાત્રિ સ્વરૂપ પેઇન્ટિંગમાં દર્શાવ્યું છે.

 જ્યારે આગામી દિવસોમાં અન્ય મહાગૌરી અને સિદ્ધિદાત્રી સ્વરૂપોના પેઈન્ટિંગ્સ બનાવશે.

જેમાં આર્ટિસ્ટ એ મિક્સ મીડિયા ઓન પેપર, પેન ઓન પેપર માધ્યમનો ઉપયોગ કર્યો છે. એક સ્વરુપ બનાવતાં આર્ટિસ્ટ કમલેશ વ્યાસને એકથી દોઢ કલાકનો સમય લાગતો હોય છે. આવી અનોખી માઇ ભક્તિ જોઈને તમે પણ મંત્રમુગ્ધ થઈ જશો.