વડોદરા: દારૂ છુપાવવાની ગજબ કારીગરી! કારમાં એવી જગ્યાએ દારૂ રાખ્યો કે માનવામાં જ ન આવે

વડોદરા: ગુજરાતમાં દારૂબંધી હોવા છતાં ગઠિયાઓ દારૂ ઘુસાડવાની અવનવી રીતો અપનાવતા થયા છે. વડોદરામાં પણ ફિલ્મી સ્ટાઇલમાં દારૂ છુપાવવાનો ગજબ કિસ્સો સામે આવ્યો છે. વડોદરા ગ્રામ્ય એલસીબીએ કારના બમ્પર તથા પાર્કિંગ લાઈટમાં ફિલ્મી સ્ટાઇલથી દારૂનો છુપાવેલો જંગી જથ્થો ઝડપી પાડ્યો છે. જોકે, આ ગઠિયાઓની કારીગરી જોઇને એકવાર પોલીસ પણ હેરાન થઇ ગઇ હતી. રાજસ્થાનથી બે શખ્સો કારમાં દારૂ લાવવાના હોવાની વાતની આધારે વડોદરા ગ્રામ્ય એલસીબીની ટીમે કારને આંતરી બે લોકોને ઝડપી પાડ્યા હતા.

મોંઘીદાટ કારમાં જે રીતે દારૂ છુપાવ્યો હતો તે જોઈને એલસીબીની ટીમ પણ ચોંકી ઉઠી હતી.

રાજસ્થાનથી બે શખ્સો કારમાં દારૂ લાવવાના હોવાની વાતના આધારે વડોદરા ગ્રામ્ય એલસીબીની ટીમે કારને આંતરી બંનેને ઝડપી પાડ્યા હતા. એલસીબીની ટીમે એક્સપ્રેસ વે પર આવેલા સિસવા ગામ નજીકથી દારૂ ભરેલી કાર ઝડપી પાડી હતી.

રાજસ્થાનના ઉદલપુર થઈને દારૂનો જથ્થો ઉમરેઠ અને આણંદ થઈને વડોદરા લાવવામાં આવી રહ્યો હતો.

આ અંગેની બાતમી મળતા જ એલસીબીની ટીમ તૈયાર થઇ ગઇ હતી. રૂપિયા 2.39 લાખના બે વિદેશી દારૂ અને 7 લાખની કાર સહિત 9.54 લાખના મુદ્દામાલ સાથે બેની ધરપકડ કરવામાં આવી છે.

આ ગોરખધંધો કરતા એલસીબીની ટીમે બે લોકોને પકડી પાડ્યા હતા. જેમા એક વડોદરાના ગોરવાનો અનિકેશ ત્રિપાઠી અને બીજો રાજસ્થાનનો મોહનસિંઘ શેખાવત છે.

આવો જ અન્ય એક કિસ્સો સામે આવ્યો હતો. જેમાં PCBને બાતમી મળી હતી કે, મધ્યપ્રદેશથી દારુનો જથ્થો આવી રહ્યો છે. તેમને મળેલી બાતમી પ્રમાણે, અટલાદરા પાણીની ટાંકી પાસે આવેલા માધવનગર એ ટાવરમાં રહેતો અજય ગાયકવાડ નામનો બુટલેગર મધ્યપ્રદેશથી દારૂનો જથ્થો લાવી ભાડાના મકાનમાં વેચાણ કરે છે.

આ જથ્થો મધ્યપ્રદેશથી કારમાં આવવાનો છે. આ આધારે પીસીબીની ટીમ ત્રાટકી હતી. પીસીબી દ્વારા કાર સાથે મકાનમાંથી દારૂના જથ્થા સાથે ત્રણ બુટલેગરોને ઝડપી પડ્યા હતા. આ અંગે પીસીબી દ્વારા પ્રોહિબીશન અંતર્ગત માંજલપુર પોલીસ મથકમાં કાર્યવાહી કરી હતી.