Vadodara: જા..જા..જા..કબૂતર જા..દોરીથી ઘાયલ પક્ષીઓને આઝાદ કરાયા, જોવા જેવા છે ફોટો

Nidhi Dave, Vadodara: વડોદરાના વનવિભાગમાં આ વર્ષની ઉત્તરાયણ વખતે પતંગની દોરીમાં ફસાઈને ઘાયલ થયેલા અનેક કબૂતરો સારવાર હેઠળ હતા. જેમાં વનવિભાગના અધિકારીઓ તેમજ કર્મચારીઓના સહયોગ અને કાળજીથી દરેક કબૂતર સાજા થઈને હવે ખુલ્લા આકાશમાં વિહરવા તૈયાર હતા.

માંજલપુર સ્થિત સ્વામી વિવેકાનંદ સ્કૂલના બાળકોએ વનવિભાગની મુલાકાત લીધી હતી. જ્યાં વનવિભાગના અધિકારીઓ દ્વારા તેમને વન વિભાગની કામગીરી અંગેની વિસ્તૃત જાણકારી સાથે સમજ આપવામાં આવી હતી. આર. એફ. ઓ. કરણસિંહ રાજપૂતે જણાવ્યું કે, સામાન્ય નાગરિકોએ પોતાની ફરજ માનીને અને માનવતા ખાતર ઘાયલ થયેલા પશુ-પક્ષીઓની જાણકારી તરત જ અમારા ટોલ ફ્રી નંબર પર કરવી જોઈએ, જેથી કરીને અમારી રેસ્ક્યુ ટીમ જે તે સ્થળે પહોંચી શકે. અમારી રેસ્ક્યુ ટીમ 24 કલાક કાર્યરત છે.

બાલ ભવન પાસે સામાજિક વનીકરણ હોસ્પિટલમાં આપવામાં આવેલી સારવારથી લગભગ 20 જેટલાં કબૂતરોને સંપૂર્ણ સાજા થયા બાદ છોડવામાં આવ્યા હતા. ઉત્તરાયણના તહેવાર દરમિયાન પક્ષીઓના રક્ષણ માટે સક્રિય પગલાં લેવા વિદ્યાર્થીઓ સાથે જાગૃત થવાનો સંકલ્પ લેવામાં આવ્યો છે.

રેન્જ ફોરેસ્ટ ઓફિસર કરણસિંહ રાજપૂતે જણાવ્યું હતું કે, \"આ વર્ષે ઉત્તરાયણના તહેવારમાં 1162 પક્ષીઓ ખરાબ રીતે ઘાયલ થયા બાદ હોસ્પિટલમાં લાવવામાં આવ્યા હતા. ઘાયલ પક્ષીઓની યાદીમાં 90% પક્ષીઓ કબૂતરો છે. તબીબોની ટીમે ફોરેસ્ટ વિભાગની અંદરની હોસ્પિટલમાં સારવાર કરી હતી.

કરુણા અભિયાનમાં આ વર્ષે લગભગ 700 સ્વયંસેવકો જોડાયા હતા. તેમના પ્રયાસોથી આ સારવાર શક્ય બની છે. અમે વિદ્યાર્થીઓને સાજા કબૂતરોને છોડવા માટે આમંત્રિત કર્યા છે, જેથી કરીને તેઓ પક્ષીઓને બચાવવા માટે આવતા વર્ષે સક્રિય પગલાં ભરવા માટે સંવેદનશીલ બની શકે.

ઘાયલ થયેલા 1162 પક્ષીઓમાંથી 201 હજુ સારવાર હેઠળ છે અને બાકીનાને તેમના કુદરતી રહેઠાણમાં છોડવામાં આવ્યા છે. હાજર રહેલ દરેક વિદ્યાર્થીઓએ પ્રાણીઓને બચાવવા, વૃક્ષો વાવવા અને પર્યાવરણ બચાવવાની પ્રતિજ્ઞા લીધી.