વડોદરામાં 'આયેશા' જેવો બનાવ: વીડિયો રેકોર્ડ કરી 25 વર્ષની નફીસાએ જિંદગી ટૂંકાવી લીધી

વડોદરા: 25 ફેબ્રુઆરી, 2021ના રોજ અમદાવાદની આયેશા નામની એક યુવતીએ રિવરફ્રન્ટ (Ayesha Suicide case) ખાતે વીડિયો રેકોર્ડ કરીને આપઘાત કરી લીધો હતો. આ બનાવે આખા દેશમાં ચર્ચા જગાવી હતી. આ કેસમાં તાજેતરમાં જ તેના આરોપી પતિને 10 વર્ષની જેલની સજા પડી છે. હવે આવો જ એક બનાવ વડોદરા શહેર (Vadodara Nafisa suicide case)માં બન્યો છે. યુવતીએ પોતાના ઘરે ગળેફાંસો ખાઈને આપઘાત કરી લીધો છે. યુવતીના પરિવારના લોકોએ આક્ષેપ કર્યો છે કે નફીસા અમદાવાદના એક યુવકના પ્રેમ સંબંધ (Love Matter)માં હતા. પ્રેમ પ્રકરણમાં જ નફીસાએ આપઘાત કરી લીધો છે.

અમદાવાદની આયેશાએ આપઘાત પહેલા સાબરમતી રિવરફ્રન્ટ ખાતે વીડિયો રેકોર્ડ કર્યો હતો. નફીસાએ પણ સાબરમતી રિવરફ્રન્ટ ખાતે વીડિયો રેકોર્ડ કરીને વડોદરા ખાતે આપઘાત કર્યો છે. મળતી માહિતી પ્રમાણે બે દિવસ પહેલા તાંદલજાની નફીસા ખોખરે (Nafisa Khokhar) ગળેફાંસો ખાઈ જીવન ટૂંકાવ્યું હતું. નફીસાએ આ પહેલા અમદાવાદ ખાતે જઈને બે વખત આપઘાતનો પ્રયાસ કર્યો હતો.

નફીસાના પરિવારજનોએ આક્ષેપ લગાવ્યો છે કે નફીસાએ અમદાવાદમાં રહેતો શેખ રમીઝ અહેમદ નામના યુવકના પ્રેમમાં આવું પગલું ભર્યું છે. 25 વર્ષીય નફીસા તાંદલજાના નૂરજહાં પાર્કમાં રહેતી હતી.

આ મામલે નફીસાના પરિવારજનોએ જે.પી પોલીસ સ્ટેશનમાં અમદાવાદના યુવક રમીઝ વિુરદ્ધ ફરિયાદ નોંધાવી છે. યુવતીના પરિવારજનોએ એવો પણ આક્ષેપ કર્યો છે કે પોલીસ સ્ટેશનમાં તેમને બે દિવસથી ધક્કા ખવડાવવામાં આવે છે.

આપઘાતના કારણ વિશે યુવતીના પરિવારજોએ જણાવ્યું કે, નફીસા અમદાવાદના યુવક સાથે પ્રેમ સંબંધમાં હતી. યુવતી અમદાવાદ યુવકના ઘરે જતી હતી અને ત્યાં રોકાતી પણ હતી. યુવક રમીઝ પણ અમદાવાદ આવતો હતો અને રોકાતો હતો. બંને લગ્ન પણ કરવાના હતા. જોકે, રમીઝના પરિવારજનો લગ્નની વાત પરથી ફરી જતા નફીસા આઘાતમાં આવી ગઈ હતી. આ કારણે તેણીએ ગળેફાંસો ખાઈને આપઘાત કરી લીધો હતો.

નફીસા વીડિયોમાં જણાવી રહી છે કે, "મને ઘરની કે ઘાટની નથી રાખી. મારી ખૂબ ખરાબ હાલત કરી નાખી છે. ચાર દિવસથી તને શોધી રહું છું. મેં પોલીસને પણ નથી જણાવ્યું."

"તું ખૂબ ખોટું કરી રહ્યો છે. હું તારા ઘરે ગઈ હતી. તારા ભાઈ, તમારા મમ્મી-પપ્પા હતા. તે આટલા બધા વચનો આપ્યા અને ફરી ગયો. છોકરી સાથે આવું ન કરવું જોઈએ. રમીઝ તે મારી સાથે ખૂબ ખોટું કર્યું છે. લગ્નનું વચન આપીને મારો ઉપયોગ કરતો રહ્યો, તું આવ્યો નહીં. તારે આવું કરવાની જરૂર ન હતી."