વડોદરાના 7 વિદ્યાર્થીઓએ રાજસ્થાનમાં ડંકો વગાડ્યો; આ સિદ્ધિ હાંસલ કરી

Nidhi Dave, Vadodara: રાજસ્થાનના જયપુરના ટોંકમાં અતરંગ કલા અવામ એજ્યુકેશન વેલ્ફેર સોસાયટી દ્વારા 16 મા નેશનલ આર્ટ ફેસ્ટિવલ, ક્રેયન્સનું આયોજન કરવામાં આવ્યું હતું, જેમાં આદિત્ય ફાઈન આર્ટ્સના 7 વિદ્યાર્થીઓએ ભાગ લીધો હતો.

જેમાં શ્રેષ્ઠ કલાકાર તરીકે વિદ્યાર્થીઓનું સન્માન કરવામાં આવ્યું હતું. વડોદરા શહેરના કલાકારો ફક્ત વડોદરામાં જ નહીં પરંતુ દેશભરમાં અલગ અલગ રાજ્યમાં અને શહેરોમાં પોતાની કલા પ્રદર્શિત કરી રહ્યા છે અને સન્માન પણ પ્રાપ્ત કરી રહ્યા છે.

રાજેન્દ્ર દિંડોરકરે જણાવ્યું હતું કે, ત્રણ દિવસમાં અમે 8 કલાકારો દ્વારા કેન્વાસ પર એક્રેલિક કલરથી પેઇન્ટિંગ્સ કર્યાં હતાં. જેમાં ગ્રૂપના 3 કલાકારને ઍવોર્ડ પણ મળ્યા. 16માં નેશનલ આર્ટ ફેસ્ટિવલ, ક્રેયન્સમાં મને તથા મારો સિનિયર કલા વિદ્યાર્થી રજનીકાંત અગ્રાવતને ગેસ્ટ આર્ટિસ્ટ તરીકે આમંત્રિત કર્યા હતાં.

જેમાં આયોજકોએ શ્રેષ્ઠ કલાકાર તરીકે અમારુ સન્માન કર્યું. આ વડોદરા શહેર માટે એક ખૂબ જ ગૌરવની વાત કહેવાય કે, વડોદરાના કલાકારો બીજા રાજ્યમાં જઈને વડોદરાનું નામ રોશન કર્યું છે.

આ ફેસ્ટિવલમાં બધાને મેડલ પહેરાવી સર્ટિફિકેટ આપી સન્માનિત કર્યા હતા.જેમાં સિનિયર કેટેગરીમાં અવની દિંડોરકરને આઉટ સ્ટેન્ડિંગ વર્ક, હર્ષ રાણાને પ્રોત્સાહન અને રોનક ઘેડિયાને સિલ્વર મેડલ પ્રાપ્ત થયા છે. આ ઉત્સવમાં 16 રાજ્યમાંથી 350થી વધુ કલાકારોએ ભાગ લીધો હતો.

વડોદરાના રાજેન્દ્ર દિંડોરકર, અવની દિંડોરકર, જયના જેમ્સ, રજનીકાંત અગ્રવાત, હર્ષા લખાની, હર્ષ રાણા, અલકા કરણદીકર, રોનક ઘેડીયાએ ભાગ લીધો હતો. આ તમામ કલાકારોએ વડોદરા અને વડોદરાની કલાને ગૌરવ અપાવ્યું છે.