Vadodara: જયાં ગુજરાતી ત્યાં ગરબા; ગુજરાતના 12 ટ્રેકર્સે માઈનસ 30 ડિગ્રીમાં ગરબા રમ્યાં

Nidhi Dave, Vadodara: વડોદરાની થ્રિલ બ્લેઝર્સ ટીમે ફરી એકવાર કોઈના કરી શકે તેવું કરી બતાવ્યું છે. ટીમના 12 ટ્રેકર્સએ લેહ ખાતે આવેલી ઝંસ્કર નદી પરના ચાદર ટ્રેક ઉપર આવેલા નેરક ધોધ ખાતે માઈનસ 30 ડિગ્રી તાપમાનમાં ગરબા રમીને જમીનથી 11,500 ફૂટ ઊંચાઈ ઉપર ગુજરાતી સંસ્કૃતિનું પ્રતિનિધિત્વ કર્યું. ગુજરાતમાંથી આ એકમાત્ર એવી કંપની છે જેણે આ ટૂર જાતે જ કરી છે.

સમગ્ર ટ્રેકિંગ વિશે માહિતી આપતા થ્રિલ બ્લેઝર્સના સ્થાપક અને પ્રશિક્ષક એવા ધૈવત પંડ્યાએ જણાવ્યું હતું કે, ટીમે વર્ષના પહેલા જ મહિના જાન્યુઆરીમાં આ સ્થળની મુલાકાત લીધી અને માઈનસ 30 ડિગ્રીમાં આ વિસ્તારની સુંદરતા નિહાળી છે.

આ સમય દરમિયાન ઝંસ્કાર નદી સંપૂર્ણપણે થીજી જાય છે. જ્યાં ટ્રેકિંગ કરવું મુશ્કેલ હોય છે. વર્ષ દરમિયાન વિશ્વભરના ફક્ત 2000 ટ્રેકર જ આ સ્થળે ટ્રેકિંગ કરવા આવે છે. જ્યાં વડોદરાના 8 સહિત ગુજરાતના 12 ટ્રેકરે ગરબા રમીને ગુજરાતની સંસ્કૃતિને વિશ્વ સુધી પહોંચાડવાનો પ્રયાસ કર્યો છે.

8મી જાન્યુઆરીએ લેહ પહોંચ્યા અને જરૂરી આરોગ્ય તપાસ બાદ 11મી જાન્યુઆરીથી ચાદર ટ્રેક શરૂ કર્યો અને એ જ દિવસે શિંગરાકોમા પહોંચ્યા અને પછી 12મી જાન્યુઆરીએ ટિમ્બ લેક પહોંચ્યા. ત્યાંથી 13મી જાન્યુઆરીએ અમે નેરક વોટરફોલ તરફનો અમારો ટ્રેક શરૂ કર્યો અને 30 કિલોમીટરની મુસાફરી પછી તે જ દિવસે ટિમ્બ લેક પર પાછા ફર્યા કારણ કે આગળ કેટલીક થીજી ગયેલી નદી તૂટી ગઈ હતી.

તેમ છતાં અમે ટ્રેકિંગ પૂર્ણ કર્યું. જે દરમિયાન અમે કુલ 100 થી વધુ કિલોમીટરનો ટ્રેક પૂર્ણ કર્યો હતો. ટ્રેકિંગ સમયે મોબાઈલમાં નેટવર્ક નહોતું અને માત્ર પાયાની જરૂરિયાતોના સહારે જ અમે ટ્રેકિંગ પૂર્ણ કર્યું હતું. જેથી કોઈપણ વૈભવી સુવિધાઓ વિના જીવન જીવવાનો મૂલ્યવાન પાઠ ટ્રેક દરમિયાન અમે શીખ્યા હતા.

વડોદરાની થ્રિલ બ્લેઝર્સ એડવેન્ચર કંપનીએ ગુજરાત ટુરિઝમ એવોર્ડ 2021-22માં ચાર એવોર્ડ જીત્યા હતા અને ટ્રેકર્સ માટે નવા સ્થળોની શોધખોળ માટે તેમની શોધ ચાલુ રાખવાનું વચન આપ્યું હતું. જે વચનને તેઓ સારી રીતે નિભાવી રહ્યા છે.

દરરોજ ટીમે સ્લીપિંગ બેગ સહિત તમામ જરૂરી સાધનો લઈને સરેરાશ 15 કિલોમીટરનો ટ્રેક કર્યું હતું. ચાદર ટ્રેકને વિશ્વનો સૌથી ખતરનાક ટ્રેક માનવામાં આવે છે. કારણ કે આ ટ્રેક ઉપર આવેલી સ્થિર નદી પર બરફનું આવરણ સરકવાનું અને પથ્થર પડવા જેવી અનેક ઘટનાઓ બનતી હોય છે.

આ સાથે, હાયપોથર્મિયા, ઓછો ઓક્સિજન, ભીના પગ, નાકમાંથી લોહી નીકળવું, બરફમાંથી સૂર્યપ્રકાશનું પ્રતિબિંબ પડવું જેવા પડકારો તો ખરા જ. આ સાથે આઈસ લેપર્ડનો ખતરો દરેક ટ્રેકર માટે ખતરા સમાન હોય છે. સ્થાનિક સપોર્ટ વગર આ ટ્રેક પૂર્ણ કરવો શક્ય થઈ જતો હોય છે.