ગુજરાતમાં ફરી વાઘ દેખાયો? મહિસાગરના કંતારના જંગલોમાં જોવા મળ્યા પંજાના નિશાન

મહિસાગર : ગુજરાતમાં ફરીથી વાઘ હોવાની વાતે વેગ પકડ્યો છે. એક વર્ષ અગાઉ મહિસાગારના કંતારના જંગલોમાં વાઘ આવી ચડ્યો હતો. મધ્ય પ્રદેશથી ચાલીને ગુજરાત પહોંચેલો આ વાઘ છેલ્લે ખોરાકના અભાવે મરી ગયો હતો ત્યારે ફરી એક વાર વાઘના પંજાના નિશાન હોવાની અને અવાજ આવતો હોવાની વાતે જોર પકડ્યું છે.

ગુજરાતમાં વાઘ હોવાની વાતે જોર પકડ્યું છે ત્યારે આ વાતની પુષ્ટી કરવા માટે વનવિભાગ ફરી કામે વળગ્યું છે. કંતારના સ્થાનિક કહે છે કે જંગલમાં પશુઓનું મારણ થયું છે પરંતુ કોઈએ નજરે જોયું નથી.

મહિસાગરમાં ઝાડ પરથી વાઘના પંજાના નિશાન મળી આવ્યા છે પરંતુ તે એક વાયરલ વીડિયોનો ભાગ છે. આ મુદ્દે સ્થાનિકોનું કહેવું પણ એવું જ છે કે કોઈએ વાઘ જોયો નથી પરંતુ તેનો અવાજ સંભાળય છે તે પણ એટલી જ સત્ય વાત છે.

વર્ષ 1979માં ગુજરાતમાં છેલ્લે વાઘ દેખાયો હતો ત્યારે ગત વર્ષે ૨7 વર્ષ બાદ ગુજરાતમાં મહિસાગરના જંગલોમાં વાઘ દેખાયો હતો. ગુજરાતને જાણે પ્રકૃતિની ભેટ મળી છે. લુણાવાડાના ગઢ ગામ પાસે એક પ્રાથમિક શિક્ષકે વાઘને જંગલમાં જોયો હતો અને તેની તસવીર પણ લીધી હતી.

આ ઘટના બાદ રાજ્યના વન વિભાગના 200 કર્મચારીઓએ સર્ચ ઓપરેશન શરુ કર્યુ હતું જેમાં નાઇટવિઝન કેમેરામાં વાઘે દેખા દીધી હતી. નોંધનીય છે કે,દિપડા,સિંહ અને વાઘ હોય તેવુ ગુજરાત પ્રથમ રાજ્ય બન્યું હતું. આ વખતે કંતારમાં વાઘ હોવાની વાતે વેગ પકડતા સ્થાનિકોમાં ફરીથી ચર્ચા જાગી છે.

મહિસાગરના આ વિસ્તારમાં જે જગ્યાથી નિશાન મળી આવ્યા હોવાની વાત વહેતી થઈ રહી છે તે જગ્યાથી વાઘનો મૃતદેહ મળ્યો હતો. જોકે, આ વાયરલ વીડિયોની કોઈ પુષ્ટી થઈ નથી. મહિસાગરમાં વાઘ હોવાની શક્યતાને નકારી શકાતી નથી.