મહિસાગર: કોરોનામાં જીવના જોખમે મુસાફરી, 100 મુસાફર ભરેલી ખાનગી ટ્રાવેલ્સની બસ પલટી

મહિસાગર: કોરોના કાળમાં લોકોના જીવ જોખમમાં મૂકવાનો એક બનાવ મહિસાગરમાં સામે આવ્યો છે. અહીં મુસાફરોથી ખીચોખીચ ભરેલી ખાનગી ટ્રાવેલ્સની એક બસ પલટી ગઈ હતી. ઘાયલ મુસાફરોને સારવાર માટે હૉસ્પિટલમાં ખસેડવામાં આવ્યા છે. મળતી માહિતી પ્રમાણે બસમાં 100 જેટલા મુસાફરોનો ભરવામાં આવ્યા હતા. હાલ કોરોનાનું સંક્રમણ વધી રહ્યું છે ત્યારે ખાનગી બસોમાં સોશિયલ ડિસ્ટન્સિંગ સાથે 60 ટકા મુસાફરો ભરવાની જ છૂટ આપવામાં આવી છે. ત્યારે આ બસમાં નિયમોને નેવે મૂકીને 100 મુસાફરો ભરવામાં આવ્યા હતા. સામાન્ય રીતે બસની કેપેસિટી 40થી 45 મુસાફરોની હોય છે, પરતું આ બસમાં કેપેસિટીના બે ગણાથી પણ વધારે મુસાફરો ભરી દેવામાં આવ્યા હતા.

જે બસ પલટી ગઈ હતી સંતરામપુરથી કાલાવડ ખાતે શ્રમિકોને મૂકવા માટે જઈ રહી હોવાનું માલુમ પડ્યું છે. આ દરમિયાન સંતરામપુર નજીક પઠારીયા ગામ ખાતે બસ પલટી ગઈ હતી. બસ પલટી જતાં તેમાં સવાર મહિલાઓ અને બાળકોને ગંભીર ઈજા પહોંચી હતી. ગંભીર ઈજા પહોંચી હોય તેવા તમામ મુસાફરોને ગોધરા અને વડોદરા ખાતે ખસેડવામાં આવ્યા છે. જ્યારે નાની મોટી ઈજા પહોંચી હોય તેવા લોકોને લુણાવાડા સિવિલ હૉસ્પિટલ ખાતે ખસેડવામાં આવ્યા છે.

કોરોના કાળમાં ખાનગી બસોના માલિકો વધારે કમાણી કરવા માટે નિયમ કરતા વધારે મુસાફરો ભરતા હોય છે. આવું કરવાથી કોરોનાનું સંક્રમણ વધવાની સાથે સાથે અકસ્માતના કિસ્સામાં ઇજા કે મોત થવાનું જોખમ પણ વધારે રહે છે.

અકસ્માતનો ભોગ બની છે તે બસ સુરત આરટીઓ ખાતે નોંધાયેલી છે. રવિવારે રાત્રે 10 વાગ્યાની આસપાસ આ બસ પલટી ગઈ હતી. ગામના લોકોના જણાવ્યા પ્રમાણે બસ બેથી ત્રણ પલટી મારી ગઈ હતી.

અકસ્માત બાદ ગામ લોકો મદદ માટે દોડી આવ્યા હતા. જે બાદ 108ને જાણ કરવામાં આવી હતી. જેમાં 15 જેટલા લોકોને ગંભીર ઈજા પહોંચી હતી. તે લોકોને સારવાર માટે ગોધરા સિવિલ ખાતે ખસેડવામાં આવ્યા હતા. જ્યારે નાની-મોટી ઈજા પહોંચી હતી તેમને લુણાવાડા ખાતે ખસેડવામાં આવ્યા હતા.

ગામના સરપંચે આ મામલે જણાવ્યું હતું કે, રાત્રે 10 વાગ્યાની આસપાસ અચાનક ધડાકા સાથે બસ પલટી ગઈ હતી. જે બાદમાં અમે તાત્કાલિક ઘાયલોને 108ની મદદથી સારવાર માટે ખસેડ્યા હતા. બસમાં ખીચોખીચ મજૂરો ભરેલા હતા.

બસ બેથી ત્રણ પલટી મારી ગઈ હતી.