મહીસાગર: નશામાં ધૂત કાર ચાલકે બાઇક ચાલકને એક કિલોમીટર ઢસડ્યો, બાઇક ચાલકના શરીરના ટુકડા થઇ ગયા

આ ગમખ્વાર અકસ્માતમાં મૃતક રસુલપુર ગામ પાસેથી કાર લઇને જઇ રહ્યો હતો. ત્યારે પાછળથી ચિક્કાર પીધેલી હાલતમાં કાર ચાલક આવ્યો હતો અને તેને એક કિલોમીટર સુધી ઢસડ્યો હતો. દારૂનાં નશામાં કાર ચાલક એટલું ભાન પણ ભૂલ્યો હતો કે, કારની નીચે એક માણસ ઢસડાઇ રહ્યો છે.

મહીસાગર: રસુલપુર ગામ પાસેનો આઘાતજનક અક્સમાત સામે આવ્યો છે. જેમાં નશામાં ધૂત કારચાલકે બાઇક ચાલકને એક કિલોમીટર સુધી ઢસડ્યો હતો. જેના કારણે બાઇક ચાલકનાં શરીરનાં ટુકડે ટુકડા થઇ ગયા હતા અને તેનું મોત નીપજ્યુ છે. આ અકસ્માત બાદ લોકોનાં ટોળે ટોળા ઘટનાસ્થળે ભેગા થઇ ગયા હતા. લોકોએ નશામાં ધૂત કાર ચાલકને ઢોરમાર માર્યો હતો. નોંધનીય છે કે, થોડા દિવસ પહેલા જ દિલ્હીમાં પણ આવી જ એક ઘટના સામે આવી હતી જેમાં એક યુવતીનું મોત નીપજ્યુ હતુ.

આ અકસ્માત સર્જનાર વ્યક્તિ ક્યાંનો છે અને ક્યાંથી ક્યાં જઇ રહ્યો છે તે હાલ પોલીસ તપાસ કરી રહી છે. હાલ પોલીસે આ કાર ચાલકની ધરપકડ કરી લીધી છે. જોકે, તેની ધરપકડ બાદ પણ લોકોમાં ભારે રોષ જોવા મળી રહ્યો છે. (કાર ચાલકની તસવીર)

આ અકસ્માત બાદ કારચાલકે પણ કાબુ ગુમાવ્યો હતો અને એક ખેતરમાં ઝાડ પાસે કારને અથાડી દીધી હતી.

સ્થાનિક લોકોમાં એટલો રોષ હતો કે, લોકોએ ચાલકને પકડી પાડીને ઢોર માર માર્યો હતો. જે બાદ ચાલક શર્ટનાં બટન પણ કાઢી રહ્યો હતો પરંતુ તે શું બોલે છે અને કેવી હરકતો કરે છે તે કોઇની સમજમાં આવી રહ્યું ન હતુ. લોકોનાં જણાવ્યા પ્રમાણે, આ આરોપી દારૂનાં ચિક્કાર નશામાં હતો.

પરિવાર મૃતકની સ્થિતિ પણ જોઇ શકતા ન હતા. ઘરનાં સભ્યોમાં આક્રોશ સાથે આક્રંદ જોવા મળ્યું હતુ.

અકસ્માતની જાણ થતા લોકોનાં ટોળે ટોળા આવી ગયા હતા. ત્યાં પોલીસનો કાફલો પણ તપાસ માટે આવી ગયો હતો.

આ બાઇક ચાલક એ હદે ઢસડાયો હતો કે મૃતકનાં શરીરનાં ટૂકડે ટૂકડા થઇ ગયા હતા.