લુણાવાડા : મામલતદારનું ડ્રાઇવર સાથે અકસ્માતમાં મોત, સરકારી ગાડી ટ્રાવેલ્સ સાથે અથડાતા કચ્ચરઘાણ

મિતેશ ભાટીયા, મહીસાગર : મહીસાગર જિલ્લામાં (Mahisagar) મોડી રાત્રે થયેલા એક ગમખ્વાર અકસ્માતમાં (Accident) લુણાવાડા તાલુકાના મામલતદારનું (Lunawada Mamlatdar) મોત નીપજ્યું છે. મહિસાગરના લુણાવાડાના મામલતદાર સરકારી ગાડીમાં પેટ્રોલિંગમાં નીકળ્યા હતા ત્યારે રાજસ્થાન આરટીઓ પાસીંગની ટ્રાવેલ્સ સાથે સરકારી ગાડી ધડાકાભેર અથડાતા તેનો કચ્ચરઘાણ વળી ગયો હતો.

અકસ્માતમાં સરકારી ગાડીમાં સવાર ડ્રાઇવરનું ઘટના સ્થળે મોત નીપજ્યું હતું જ્યારે મામલતદારને સારવાર અર્થે લઈ જવાતા સમયે તેમનું મોત થયું હતું. ઘટનાના પગલે પોલીસનો કાફલો રસ્તા પર ઉતરી આવ્યો હતો અને ઘટનાની તપાસ શરૂ કરી હતી.

બનાવની વિગત એવી છે કે લુણાવાડાના મામલતદાર રાકેશ ડામોર સરકારી ગાડીમાં ડ્રાઇવર વિજયરાજ પગી અને અન્ય એક અધિકારી સાથે નીકળ્યા હતા. દરમિયાન લુણાવાડાના ખલાસપુર પાસે રાજસ્થાન પાસિંગની અશોક ટ્રાવેલ્સની ખાનગી લક્ઝરી સાથે ધડાકાભેર સરકારી ગાડી અથડાઈ હતી.

રાત્રિના અંધકારમાં ગાડી અથડાતા ફંગોળાઈ અને રોડની નીચે ધસી ગઈ હતી અને સરકારી ગાડીનો બુકડો બોલી ગયો હતો. આ ગાડીમાં 3 વ્યક્તિ સવાર હતી જે પૈકીના ડ્રાઇવર વિજયરાજ પગીનું ઘટના સ્થળે મોત નીપજ્યું હતું.

જોકે, ટ્રાવેલ્સમાં સવાર લોકો પણ નીચે ઉતરી આવ્યા હતા અને ગાડીમાં ઇજાગ્રસ્ત વ્યક્તિને બહાર કાઢવામાં મદદ કરી હતી તેવામાં સરકારી ગાડીમાં સવાર મામલતદાર રાકેશ ડામોરને ગંભીર ઇજાઓ પહોંચી હતી. ડામારોને સારવાર માટે લઈ જવામાં આવી રહ્યા હતા ત્યારે તેમનું મોત થયું હતું.

ટ્રાવેલ્સના મોરા સાથે સરકારી ગાડીની જોરદાર ટક્કર થઈ હોવાનું અનુમાન છે. જોકે, ટ્રાવેલ્સમાં સવાર કોઈ પણ વ્યક્તિને કે ડ્રાઇવરને પણ ઇજા પહોંચી હોવાના અહેવાલો નથી. દરમિયાન સરકારી અધિકારીને પેટ્રોલિંગ કરવા જતા કાળ ભેટી ગયો છે. અકસ્માતને પગલે ગાંધીનગર સુધી મોડી રાત્રે ફોન રણકી ઉઠ્યા હતા.

પોલીસે અકસ્માતમાં અથડાયેલી બસના ડ્રાઇવર સાથે તેનો કબ્જો લઈને આગળની કાર્યવાહી હાથધરી છે પરંતુ હાઇવે પર બેફામ દોડતી ખાનગી લક્ઝરીઓ સામે કાળજી રાખીને ડ્રાઇવિંગ કરવું જ આવશ્યક છે. જોકે, આ અકસ્માત કેવી રીતે સર્જાયો એ તો સરકારી ગાડીમાં સવાર ત્રીજી વ્યક્તિના નિવેદન પરથી જ જાણી શકાશે.