નડિયાદ: રોબોટ કરી રહ્યો છે ભાજપના ઉમેદવારનો પ્રચાર, વહેંચી રહ્યો છે પેમ્ફલેટ

નડિયાદ: ગુજરાતી વિધાનસભાની ચૂંટણી માટે ઉમેદવારી પત્રો ભરાઈ ચૂક્યા છે અને હવે ઉમેદવારો પ્રચાર પ્રસારમાં લાગી ગયા છે. આ વખતે ઉમેદવારો પ્રચાર પ્રસાર માટે અવનવી ટેકનિકનો ઉપયોગ કરી રહ્યા છે અને એમાં ખાસ કરીને વડાપ્રધાન નરેન્દ્ર મોદીનું ડિજિટલ ઇન્ડિયાનું જે સપનું છે, એ સપનાને સાકાર કરવા માટે ખેડા જિલ્લાની નડિયાદ વિધાનસભા બેઠક પર ભાજપના ઉમેદવાર પંકજભાઈ દેસાઈના ચૂંટણી પ્રચારમાં ડિજિટલ રોબોટ ટેકનીક અપનાવવામાં આવી રહી છે. આ ડિજીટલ રોબોટ દ્વારા ભાજપના નડિયાદ વિધાનસભાના ઉમેદવારનો પ્રચાર કરવામાં આવી રહ્યો છે અને લોકો પણ આ રોબોટને જોઈને આશ્ચર્યચકિત થઈ રહ્યા છે.

વડાપ્રધાન નરેન્દ્ર મોદી સતત ડિજિટલ ઇન્ડિયાની વાતો કરી રહ્યા છે અને તેમનું સપનું છે કે, ભારત ડિજિટલ બને અને એટલા માટે જ ગત 2017ની વિધાનસભાની ચૂંટણી હોય કે 2019ની લોકસભાની ચૂંટણી, એમાં વડાપ્રધાન નરેન્દ્ર મોદીએ પણ ડિજિટલ ટેકનોલોજીનો ઉપયોગ કરીને પ્રચાર પ્રસાર કર્યો હતો. હવે આવી જ ટેકનોલોજીનો ઉપયોગ ગુજરાત વિધાનસભાની ચૂંટણીમાં પ્રચાર પ્રસાર કરવા માટે થઈ રહ્યો છે. હાલમા ડિજિટલ રોબોટનું ચલણ શરૂ થયું છે, પરંતુ આ ડિજિટલ રોબોટ વિધાનસભાની ચૂંટણીના પ્રચારમાં વાપરવાની સૌપ્રથમ શરૂઆત ખેડા જિલ્લાના નડિયાદ વિધાનસભા બેઠક પરથી કરવામાં આવી છે.

આ અંગે કાર્યકર જણાવી રહ્યા છે કે, આ કોન્સેપ્ટ છે, એમાં એક રોબોટ છે. એ રોબોટની અંદર આપણે અત્યારે એના દ્વારા હાઇટેક પ્રચાર કરી રહ્યા છે. 2014થી જ્યારે નરેન્દ્ર મોદી પ્રધાનમંત્રી બન્યા છે ત્યારથી એમનો એક ડિજિટલ ઇન્ડિયા કોન્સેપ્ટ ચાલુ થયો છે અને અમે પણ ડિજિટલ ઇન્ડિયામાં કંઈક નવું કરીએ ત્યારે અમારી સાથે કારોબારીમાં કે ધ્રુવ પંડિત કરીને છે એમની ખાસ ઓળખ હતી. આમાં અને એમણે સુધારા વધારા કરીને ખાસ રોબોટ બનાવ્યો છે અને ખૂબ મહેનતે આ એક રોબોટ બન્યો છે. આ પ્રયોગ દ્વારા અમે સૌને પેમ્પલેટ આપી રહ્યા છે અને રોબોટ દ્વારા અમે પ્રચાર પ્રસારનું માધ્યમ બનાવ્યું છે. આ રોબોટમાં અમે ઉમેદવારના કામગીરીના પેમ્પલેટ છપાવ્યા છે, જે મૂક્યા છે. સાથે જ ચૂંટણીના સ્લોગન પણ આમાં ફીટ કર્યા છે. જે બોલશે એટલે હાઈટેક ડિજિટલ ચૂંટણી પ્રચાર આના થકી કરવામાં આવશે.

સાથે જ સ્પીકર દ્વારા જુદા-જુદા વિસ્તારમાં મારા દ્વારા જે કામો થયા છે તે પણ લોકોને સંભળાશે અને જ્યાં અમારી વિધાનસભાનું કાર્યલય છે, જે લોકો આવશે એમાં આ રોબોટ ફરશે અને પ્રચાર કરતો રહેશે. હાલમાં અમારી વિધાનસભામાં એક રોબોટ અમે પ્રચાર પ્રસાર માટે મૂક્યો છે. હાઈટેક રોબોટ છે અને લોકોને કંઈક નવું મળ્યું છે. આ એક નવો વિષય છે, એટલે લોકોની વચ્ચે આ સારો લોકપ્રિય બન્યો છે.

મહત્વનું છે કે, ડિજિટલ હાઈટેક યુગમાં હવે ચૂંટણી પ્રચાર પણ હાઈટેક બની રહ્યું છે. પહેલા સોશિયલ મીડિયા અને હવે હાઇટેક ટેકનોલોજીથી બનેલું ડિજિટલ રોબોટ અને તેના થકી પ્રચારનો આ નવો કોન્સેપ્ટ નડિયાદ વિધાનસભામાં શરૂ થયો છે. જેને લઇને હાલ તો આ રોબોટિક પ્રચાર નડિયાદ વિધાનસભામાં ખૂબ જ લોકપ્રિય બની રહ્યો છે.