સરકારના આ નિર્ણયથી દાહોદના 600થી વધારે બાળકોનું શિક્ષણ અંધકારમય બન્યું

સાબિર ભાભોર, દાહોદઃ રાજ્ય સરકાર (Gujarat Government) દ્રારા આદિવાસી વિસ્તારોમાં અધતન શિક્ષણ (Education) માટે મોડેલ ડે સ્કૂલો (Model Day Schools) શરૂ કરી હતી. જેને પગલે ગ્રામ્ય વિસ્તારના ગરીબ આદિવાસી બાળકો (Tribal children) માટે આ શાળાઓ (school) આશીર્વાદ રૂપ સાબિત થઈ હતી. પરંતુ એકાએક સરકાર દ્રારા રાજ્યની આઠ શાળા બંધ કરવાના નિર્ણયને પગલે દાહોદ જિલ્લાના (dahod) ગરબાડા તાલુકાની (Garbada) વજેલાવમાં ચાલતી મોડેલ ડે સ્કૂલ અને ધાનપુર તાલુકાનાં અગાસવાણીની મોડેલ  ડે સ્કૂલ પણ બંધ કરવાના નિર્ણયથી વાલીઓમાં નારાજગી જોવા મળી રહી છે. સ્થાનિકોની માંગ છે કે આ શાળા ચાલુ રહેવી જોઇએ.

દાહોદ જિલ્લો આદિવાસી બાહુલ્ય ધરાવતો જિલ્લો છે અને જિલ્લાના આદિવાસી ખેડૂતો મોટે ભાગે ખેતી અથવા મજૂરી કામ પર નિર્ભર હોય છે. અહીના આદિવાસી સમાજના લોકો રાજ્યના અન્ય જિલ્લાઓમાં રોજીરોટી માટે પણ હિજરત કરતાં હોય છે.

ત્યારે આર્થિક કટોકટીને પગલે બાળકોને સારું શિક્ષણ આપવું શક્ય નથી. ત્યારે આદિવાસી વિસ્તારોમાં સારા શિક્ષણ માટે સરકાર દ્રારા ચાલતી મોડેલ ડે સ્કૂલથી બાળકોને સારું શિક્ષણ મળી રહ્યું છે.

ત્યારે ગરબાડા તાલુકાની વજેલાવ મોડેલ ડે સ્કૂલ બંધ થવાથી શાળામાં અભ્યાસ કરતાં 215 બાળકો અને ધાનપુરની અગાસવાણી મોડેલ ડે સ્કૂલમાં અભ્યાસ કરતાં 418 બાળકો શિક્ષણથી વંચિત રહેશે.

અથવા આ બાળકોને અન્ય શાળામાં મોકલવાથી 5થી 10 કિલોમીટર સુધી દૂર જવું પડી શકે છે સાથે જ પ્રવેશ પણ મળશે કે નહીં તે પણ એક ચિંતાનો વિષય છે. બંને શાળાઓ બંધ કરવાના નિર્ણયને પગલે વાલીઓમાં નારાજગી જોવા મળી રહી છે.