Accident: દાહોદમાં કાર અને જીપ અકસ્માત, ઝાલોદ પોલીસ મથકમાં ફરજ બજાવતા પોલીસ જવાનનું મોત

સાબિર ભાભોર, દાહોદઃ ગુજરાતમાં અકસ્માતોની (Gujarat accident) ઘટનાઓ દરરોજ બનતી રહે છે ત્યારે દાહોદમાં (dahod) પણ એક અકસ્માત સર્જાયો હતો. દાહોદના ઝાલોદથી લીમડી વચ્ચે કાર અને જીપ વચ્ચે (car and jeep accident) અકસ્માત સર્જાયો હતો. જેમાં પોલીસ જવાનનું મોત નીપજ્યું હતું. આ અંગે પોલીસને જાણ થતાં ઘટના સ્થળે પહોંચીને આગળની કાર્યવાહી હાથધરી હતી.

ઝાલોદ પોલીસ મથકમાં કોન્સટેબલ તરીકે ફરજ બજાવતા મનોજ માલિવાડ આજે કોઈ કેસ અંગેની તપાસ માટે પોતાની ખાનગી કાર લઈ ને ઝાલોદથી લીમડી તરફ જતાં હાઇવે ઉપર નીકળ્યા હતા.

તે દરમિયાન ઝાલોદના બાયપાસ નજીક કાર ઓવરટેક કરતી વખતે અચાનક પુરપાટ ઝડપે સામેથી ક્રૂઝર ગાડી આવી જતાં કાર અને ક્રૂઝર ગાડી વચ્ચે અકસ્માત સર્જાયો હતો. જેમાં પોલીસ કર્મીને ગંભીર ઇજાઓ પહોચતા તાત્કાલિક દાહોદની ઝાયડસ હોસ્પિટલ ખાતે ખસેડવામાં આવ્યો હતો.

જ્યારે અન્ય એક ને પણ ઇજાઓ પહોચતા ઝાલોદની સિવિલ હોસ્પિટલ ખાતે ખસેડાયો હતો. દાહોદ ખાતે સારવાર લઈ રહેલા પોલીસકર્મીનું સારવાર દરમિયાન મોત નિપજતા પરિવારજનોમાં આંક્રંદ જોવા મળ્યો હતો.

તો બીજી તરફ પોલીસ જવાનના મોતને પગલે સમગ્ર પોલીસબેડામાં ગમગીની છવાઈ ગઈ હતી મૃતદેહને પોર્સ્ટમોર્ટ્મ અર્થે મોકલી આગળની કાર્યવાહી હાથ ધરવામાં આવી છે.