બોડેલીઃ મહિલાને હોસ્પિટલમાં દાખલ ન કરતા કમ્પાઉન્ડમાં મૃત બાળકને જન્મ આપ્યો

છોટાઉદેપુરઃ  બોડેલીમાં સરકારી હોસ્પિટલના તંત્રની લાપરવાહીનું જીવતું જાગતું ઉદાહરણ સામે આવ્યું છે. અહીં એક આદિવાસી પરિવારને હોસ્પિટલમાં સારવાર આપવાનો ઇન્કાર કરવામાં આવ્યો હતો. જે બાદમાં મહિલાએ હોસ્પિટલના કમ્પાઉન્ડમાં જ મૃત બાળકને જન્મ આપ્યો હતો. કોઈએ આ અંગેનો વીડિયો મોબાઇલમાં કેદ કરી લીધી હતો. બનાવ સામે આવ્યા બાદ જવાબદાર ડોક્ટરો સામે કાર્યવાહી કરવાની લોકમાંગ ઉઠી છે.

મળતી માહિતી પ્રમાણે બોડેલી અને જબુગામના સરકારી દવાખાનામાં એક આદિવાસી મહિલાને દાખલ કરવાનો ઇન્કાર કરી દેવામાં આવ્યો હતો. જે બાદમાં પીડિતા નિરાશ થઈને પોતાના ઘરે પરત ચાલી ગઈ હતી. પીડિત મહિલાનો પરિવાર મૂળ મધ્ય પ્રદેશનો હોવાનું તેમજ આદિવાસી હોવાનું માલુમ પડ્યું છે.

હોસ્પિટલમાં દાખલ કરવાનો ઈન્કાર કર્યા બાદ મહિલા પરિવાર સાથે ઘરે જઈ રહી હતી ત્યારે રસ્તામાં જ પ્રસુતિની પીડા ઉપડી હતી. મહિલા દવાખાનાની અંદર પહોંચે તે પહેલા જ હોસ્પિટલના કમ્પાઉન્ડમાં પ્રસુતિ થઈ ગઈ હતી. આ ઘટના અહીં હાજર કોઈ વ્યક્તિએ કેમેરામાં કેદ કરી લીધી હતી. મહિલાએ જે બાળકને જન્મ આપ્યો હતો તે મૃત હાલતમાં હતું.

આ અંગે જે વીડિયો સામે આવ્યો છે તેમાં જોઈ શકાય છે કે હોસ્પિટલના કમ્પાઉન્ડમાં જ સાડીની આડશ ઉભી કરીને મહિલાની પ્રસૃતિ કરાવવામાં આવી હતી. જોકે, હોસ્પિટલ કમ્પાઉન્ડમાં મહિલાને પ્રસૃતિ પીડા ઉપડ્યાંનું જાણીને હોસ્પિટલ સ્ટાફ પણ દોડી આવ્યો હતો.

કરુણાં એ છે કે મહિલાની જાહેરમાં જ પ્રસૃતિ કરાવવી પડી હતી અને આ માટે જે આડશ ઉભી કરવામાં આવી હતી તેને પકડીને કેટલાક પુરુષો ઉભા હતા.