છોટાઉદેપુર: મુંબઈની સુપર મોડેલ એશ્રા પટેલને નડ્યો અકસ્માત, ગંભીર ઈજા પહોંચતા હૉસ્પિટલમાં દાખલ

છોટાઉદેપુર: છોટાઉદેપુર જિલ્લામાં ગુરુવારે અકસ્માતનો બનાવ બન્યો હતો. આ બનાવમાં મુંબઈની મોડેલ એશ્રા પટેલ (Aeshra Patel accident) ગંભીર રીતે ઈજાગ્રસ્ત થઈ છે. બોડેલી (Bodeli) નજીક સૂર્યઘાડા પાસે આ અકસ્માત નડ્યો હતો. મળતી માહિતી પ્રમાણે એશ્રા પટેલ છોટાઉદેપુરથી કાવિઠા ગામ (Kavitha Village) ખાતે જઈ રહી હતી. આ દરમિયાન તેની કારની ટક્કર અન્ય કાર સાથે થઈ ગઈ હતી. એશ્રા પટેલને હાથ અને પગલમાં ઈજા થઈ હોવાનું જાણવા મળ્યું છે. ગત ગ્રામ પંચાયતોની ચૂંટણી વખતે એશ્રા પટેલે કાવિઠા ગ્રામ પંચાયતમાંથી સરપંચના પદ માટે ચૂંટણી લડી હતી. આ વખતે તેણી ખૂબ ચર્ચામાં આવી હતી.

એવી પણ માહિતી મળી છે કે એશ્રા પટેલ પોતાની કાર ખુદ ચલાવી રહી હતી. આ દરમિયાન મધ્ય પ્રદેશ તરફ જતી એક ઈકો કાર સાથે તેની કારની ટક્કર થઈ હતી. અકસ્માત બાદ એશ્રા પટેલને ઢોકલીયા પબ્લિક હૉસ્પિટલમાં ખસેડવામાં આવી હતી. જે બાદમાં તેણીને વધારે સારવાર માટે વડોદરા ખસેડવામાં આવી હતી.

અકસ્માતમાં કુલ બે વ્યક્તિને ઈજા પહોંચી છે. બીજી તરફ ટક્કર એટલી જોરદાર હતી કે બંને કારને મોટું નુકસાન પહોંચ્યું છે. એવી પણ માહિતી મળી છે કે હાથ અને પગ ઉપરાંત એશ્રાના શરીર અને મોઢા પર પણ ઈજા પહોંચી છે. ગુજરાતમાં તાજેતરમાં યોજાયેલી ગ્રામ પંચાયતોની ચૂંટણી વખતે એશ્રા પટેલ ખૂબ ચર્ચામાં આવી હતી.

સરપંચની ચૂંટણીમાં એશ્રા પટેલની હાર: ઉલ્લેખનીય છે કે તાજેતરમાં ગુજરાતમાં યોજાયેલી 10,000 કરતા વધારે ગ્રામ પંચાયતોની ચૂંટણી વખતે મોડેલ એશ્રા પટેલ ચર્ચામાં આવી હતી. એશ્રા પટેલ છોટાઉદેપુરના કાવિઠા ગામની વતની છે. એશ્રાએ પણ કાવિઠા ગ્રામ પંચાયતની ચૂંટણીમાં ઝંપલાવ્યું હતું. જોકે, સરપંચની ચૂંટણીમાં તેણીએ હારનો સામનો કરવો પડ્યો હતો.

ગ્રામ પંચાયતની ચૂંટણી વખતે ઝઘડો થતાં એશ્રા પટેલ વિરુદ્ધ પોલીસ ફરિયાદ પણ થઈ હતી. જેમાં તેણીના પ્રતિસ્પર્ધી ઉમેદવારના પતિએ એટ્રોસિટી એક્ટ હેઠળ ફરિયાદ આપી હતી. ચૂંટણી વખતે એશ્રા પટેલ અને તેમના પ્રતિસ્પર્ધીના સમર્થક સામસામે આવી ગયા હતા. આ મામલો પોલીસ મથક પહોંચ્ય હતો.

કાવિઠા ગ્રામ પંચાયતની ચૂંટણીમાં ઝંપલાવીને એશ્રા પટેલ ચર્ચામાં આવી હતી.

એશ્રા પટેલ મુંબઈની એક સુપર મોડેલ છે.