છોટાઉદેપુરમાં આવેલા આ ગામલોકો ગુજરાત ચૂંટણીમાં નથી આપી શકતા મતદાન, કારણ છે રસપ્રદ

સહેજાબ ખત્રી, છોટાઉદેપુર : ગુજરાતમાં હાલ ચૂંટણીનો માહોલ છવાયો છે. ત્યારે છોટાઉદેપુર તાલુકામાં આવેલા સજનપુરા ગામમાં ગુજરાત ચૂંટણીની કોઇ ચહલપહલ નથી.  આ ગામ લોકોએ ચૂંટણીનો બહિષ્કાર પણ નથી કર્યો. તો આપને જાણીને નવાઇ લાગશે કે, દિયાવાંટ, કોલૂ, કઠીવાડા, ગુણાટા, કનાસ, મોટોસાધલી આ તમામ  ગુજરાતના ગામની વચ્ચે આવેલું સજનપુર ગામનો ગુજરાતમાં સમાવેશ થતો નથી. આ સજનપુર ગામ મધ્યપ્રદેશમાં આવેલું છે જેના કારણે અહીં ગુજરાતની ચૂંટણીની કોઇ અસર નહીં થાય. ત્યારે તમને આશ્ચર્ય થશે કે, છોટાઉદેપુર જિલ્લામાં આવલા આ ગામનો મધ્ય પ્રદેશમાં ક્યાંથી સમાવેશ થાય? આની પાછળનું રસપ્રદ કારણ પણ આપણે જાણીએ.

મધ્ય પ્રદેશની સરહદ નજીક દિયાવાંટ, કોલૂ, કઠીવાડા, ગુણાટા, કનાસ, મોટોસાધલી આ તમામ  ગુજરાતના ગામની વચ્ચે સજનપુર ગામ આવેલું છે. લોકો પાસેથી આ અંગે મહત્ત્વની વાત જાણવા મળી કે, વર્ષો પહેલા આ ગામમાં સાધુઓની સંખ્યા ખાસ હતી. રજવાડાના સમયે આ ગામના સાધુએ મધ્યપ્રદેશના રાજા પાસેથી જાત્રા કરવા જવા માટે રકમ લીધી હતી અને તેની સામે આ ગામને તેઓએ રાજાને  આપ્યું હતું.

તેમણે રાજાને જણાવતા કહ્યુ હતું કે, હું પરત આવીશ અને આ ગામને છોડાવી લઈશ. પણ સાધુ પરત ના આવ્યા અને  ગામને ના છોડાવ્યું. ત્યારથી આ ગામ મધ્યપ્રદેશના હસ્તકમાં છે. આ ગામની સ્થિતિ વર્ષો બાદ પણ તેવી જ કથળેલી છે. સજનપુર ગામને જોડતો જે કાચો રસ્તો ગુજરાતનો હતો તે આજે પણ કાચો જ છે. જેને લઇ અવર જવર કરતા લોકોને ભારે હાલાકી પડી રહી છે. આ ઉપરાંત ગામથી માત્ર બે કિમી દૂર આવેલી શાળામાં પર જતા બાળકોને ચોમાસાના સમયે હાલત કફોડી બને છે.

આ ગામ લોકોએ પોતાની વ્યથા જણાવતા કહે છે કે, અમારું ગામ ભૌગોલિક રીતે ગુજરાતમાં અને તેનું સંચાલન મધ્ય પ્રદેશ કરે છે. પરંતુ આ ગામમાં કોઇ જ વિકાસ થયો નથી.

અમારી મધ્ય પ્રદેશ અને ગુજરાતની સરકારને વિનંતી કરીએ છીએ કે, અમારા ગામમાં પ્રાથમિક સુવિધાઓ જેમકે રસ્તા, પાણી, મેડિકલની સુવિધાઓ સુધારવામાં આવે. જેથી અમને પ્રાથમિક સુવિધાઓ માટે ભટકવું ન પડે. ગુજરાત સરકાર અને મધ્ય પ્રદેશની સરકાર મળી આ સમસ્યાઓનું નિવારણ લાવે.

ગામ લોકોએ વિરોધના સૂર ઉઠાવતા જણાવ્યું છે કે, સજનપુર સુધીનો કાચો રસ્તો ફક્ત સજનપુર ને જ નથી જોડતો આ રસ્તો ગામની મઘ્યમાંથી પસાર થઈ અન્ય ગુજરાતના ગામોને જોડે છે.

ગુજરાત સરકાર અને મઘ્ય પ્રદેશ સરકારે જાણે સજનપુર માટે જાણે ઓરમાયું વર્તન રાખ્યું હોય તેમ લાગી રહ્યું છે. અહીંથી પસાર થતા ગુજરાતીઓ પણ રસ્તો પાકો બને તેવી માંગ કરી રહ્યા છે.

આ ગામનો વિકાસ કઇ સરકાર કરશે તે જોવાનું રહ્યુ.