બુટલેગરે દારૂની હેરાફેરી માટે અજમાવી નવી જ યુક્તિ, કંડક્ટરને 'ગંધ' આવી જતાં ઝડપાયો!

સેહજબ ખત્રી, છોટાઉદેપુર: આમ તો ગુજરાતમાં દારૂબંધી (Gujarat liquor ban) છે પરંતુ અહીં સરળતાથી દેશી અને વિદેશી દારૂ મળી રહે છે. પાડોશી રાજ્યોમાંથી બુટલેગરો (Bootleggers) નવાં નવાં કીમિયા કરીને દારૂની ઘૂસણખોરી કરતા હોય છે. એટલું જ નહીં, એક વખત રાજ્યમાં દારૂ પ્રવેશી જાય તે બાદમાં એક શહેરમાંથી બીજા શહેરમાં હેરાફેરી માટે પણ અનેક કીમિયા (Tricks to transport liquor) કરવામાં આવતા હોય છે. તાજેતરમાં બોડેલી પોલીસે (Bodeli police) દારૂની હેરાફેરીનો એક નવો જ કીમિયો પકડી પાડ્યો છે. જે બાદમાં પોલીસે 32 હજાર રૂપિયાની કિંમતનો ભારતીય બનાવટનો વિદેશી દારૂ (Indian made foreign liquor)નો જથ્થો જપ્ત કર્યો છે.

દારૂની હેરાફેરી માટે બૂટલેગરનો નવો કીમિયો: દારૂની હેરાફેરી માટે તેલ, પેટ્રોલ કે પાણીના ટેન્કરનો ઉપયોગ કરવામાં આવ્યો હોવાનું તમે સાંભળ્યું હશે. આ ઉપરાંત કાર કે બાઇકની સીટ નીચે ચોર ખાના બનાવી દારૂના હેરાફેરીના કિસ્સા પણ સાંભળ્યા હશે. પેટના ભાગે બોટલો ચીપકાવીને ઉપર શર્ટ પહેરીને દારૂની હેરફેરીના કિસ્સા પણ પણ સાંભળ્યા હશે. પરંતુ અહીં તો એક બુટલેગર સરકારી બસમાં એક થેલામાં દારૂની બોટલો મૂકીને હેરાફેરી કરી રહ્યો હતો.

દારૂની હેરાફેરી માટે બુટલેગરે વિમલના થેલાનો ઉપયોગ કર્યો હતો. તેમાં ભારતીય બનાવટની દારૂની બોટલો મૂકી હતી અને આ થેલાને બસના લગેજ બોક્સમાં લગેજ તરીકે મૂકવ્યો હતો. એટલું જ નહીં, બૂટલેગરે કંડક્ટર પાસેથી લગેજની ટિકિટ પણ મેળવી હતી. જે બાદમાં બૂટલેગર પોતે બસમાં સવાર થઈ ગયો હતો.

આ બસ છોટાઉદેપુરથી અમદાવાદ શહેર ખાતે આવી રહી હતી. જોકે, આ દરમિયાન કંડક્ટરને દારૂની ગંધ આવી હતી. આથી તેણે લગેજ બોક્સ તપાસ્યું હતું. લગેજ બોક્સમાં કંડક્ટરને એક વિમલના થેલામાં દારૂની બોટલો ભરી હોવાનું માલુમ પડ્યું હતું. જે બાદમાં કંડક્ટરે પોલીસને જાણ કરી હતી.

બનાવની જાણ થતાં જ પોલીસ દોડી આવી હતી અને લગેજ બોક્સમાંથી દારૂ ભરેલો થેલો બહાર કાઢ્યો હતો. આ સાથે જ બસની અંદર બેઠેલા વિનયા રાઠવા નામના બુટલેગરને ઝડપી પાડ્યો હતો. પોલીસે તેની પાસેથી 32 હજાર રૂપિયાની કિંમતનો ભારતીય બનાવટનો વિદેશી દારૂ ઝડપી પાડ્યો હતો.

આ મામલે પોલીસે બુટલેગરની ધરપકડ કરીને કાયદેસરની કાર્યવાહી શરૂ કરી છે. બુટલેગર આ દારૂનો જથ્થો ક્યાંથી લાવ્યો હતો અને ક્યાં લઈ જતો હતો તેની તપાસ શરૂ કરી છે. સરકારી બસોમાં મોટાભાગે ચેકિંગ ન થતું હોવાથી બુટલેગરે સરળતાથી દારૂની હેરાફેરી થઈ જશે તેવું માનીને આવો કીમિયો અજમાવ્યો હોઈ શકે છે.

એસટી બસ અમદાવાદ આવી રહી હતી.