પુલવામાં હુમલાનાં શહીદોને પીપળી ગામનાં લોકોએ મુંડન કરાવી આપી શ્રદ્ધાંજલિ

જમ્મુ કાશ્મીરના પુલવામાં આતંકવાદીઓ દ્વારા કાયરતાપૂર્વક કરવામાં આવેલ આત્મઘાતી હુમલામાં ભારતના 42 વીર જવાનોએ શહીદી વ્હોરી છે. આ ઘટનાને પગલે આખા દેશમાં રોષ ભભૂકી રહ્યો છે. ત્યારે આણંદ જિલ્લાનાં પીપળી ગામ ખાતે વીર શહીદોને શ્રદ્ધાંજલિ આપવામાં આવી હતી. ગ્રામજનો દ્વારા જાહેરમાં એક શોકસભા યોજી 44 યુવાનોએ માથે મુંડન કરાવી શ્રદ્ધાંજલિ આપી છે.

આણંદનાં પીપળી ગામમાં વીર શહીદોને અનોખી રીતે શ્રદ્ધાંજલિ આપવામાં આવી હતી. ગ્રામજનો દ્વારા આજે એક ખાસ શ્રદ્ધાંજલિ સભાનું આયોજન કરવામાં આવ્યું હતું. ગામના 44 યુવાન અને વડીલોએ માથે મુંડન કરાવ્યું હતું.

શહીદોને શ્રદ્ધાંજલિ પાઠવી હતી સાથે સાથે શ્રદ્ધાંજલિ કાર્યક્રમ દરમિયાન જે પુષ્પ અર્પણ કરવામાં આવ્યા હતા. તે પુષ્પોને શહીદોની અસ્થિ સમજી આ પુષ્પ રૂપી અસ્થિઓનું આગામી રવિવારે ચાંણોદ ખાતે મા નર્મદા નદીમાં વિસર્જન કરી તેમના આત્માને શાંતિ મળે તેવી પ્રાર્થના કરવામાં આવશે.

દેશમાં ઠેર ઠેર આતંકવાદના પૂતળાનું દહન કરવામાં આવી રહ્યું છે અને સાથે સાથે કેન્ડલ માર્ચ કાઢીને વીર શહીદોને શ્રદ્ધાંજલિ પણ આપવામાં આવી રહી છે. આજે સમગ્ર દેશ શોકમાં ડૂબેલો જોવા મળી રહ્યો છે અને આતંકવાદનો સંપૂર્ણ સફાયો કરવાની માંગ કરવામાં આવી રહી છે.

પીપળી ગામ લોકોમાં પુલવામા હુમલાનો રોષ જોવા મળ્યો હતો.