સંજય ટાંક, અમદાવાદ : આજે રવિવારે, 28 ફેબ્રુઆરીના રોજ રાજ્યમાં (Gujarat) સવારે સાત વાગ્યાથી 31 જિલ્લા પંચાયત, 231 તાલુકા પંચાયત અને 81 નગરપાલિકામાં ચૂંટણી (Local Body Polls) યોજાઇ રહી છે. દરેક બેઠકો માટે આજે લોકોમાં ખાસો ઉત્સાહ દેખાઇ રહ્યો છે. બપોરે એક વાગ્યા સુધી સરેરાશ 29 ટકા મતદાન નોંધાયું છે. ત્યારે બીજી બાજુ આણંદ જિલ્લા અને બોરસદ તાલુકાના ડભાસી ગામે મતદાનનો બહિષ્કાર કર્યો છે. સવારે સાત વાગ્યાથી એક વાગ્યા સુધીમાં અહીં એકપણ મત પડ્યો નથી. આ ગામના લોકોએ મતદાનનો બહિષ્કાર કર્યો છે.
આ ગામમાં બપોરે એક વાગ્યા સુધી કોઇપણ મતદાન કરવા આવ્યું નથી. આ ચૂંટણીનો બહિષ્કાર કરતા એક બોર્ડ લગાવ્યું છે. જેમાં લખ્યું છે કે, ડભાસી ગામમાં નાળાનો પ્રશ્ન ન ઉકેલતા સમગ્ર ગામ તાલુકા-જિલ્લા -પંચાયતની ચૂંટણીનો બહિષ્કાર કર્યો છે.
ડભાસી ગામમાં 4 મતદાન મથક છે. તમામ જગ્યા પર આજ સ્થિતિ છે. સવારે સાત વાગ્યાથી મતદાન મથકો પર ચૂંટણીનો સ્ટાફ મતદારોની રાહ જોઇ રહ્યો છે. ડભાસીના પરાની રતનપુરા પ્રાથમિક શાળામાં 714 વોટમાંથી એક પણ વોટ પડ્યો નથી.
મહત્ત્વનું છે કે, આણંદ જિ.પં. અને 8 તા.પં.ની સામાન્ય ચૂંટણીમાં કુલ 12,15,739 મતદારો ધરાવે છે. જેમાં6,28,851 પુરૂષ અને 5,86,876 સ્ત્રી તથા 12 અન્ય જાતિના મતદારોનો સમાવેશ થાય છે. જયારે સૌથી વધુ આણંદ ગ્રામ્યમાં સૌથી વધુ 2,61,982અને સોજીત્રા તા.પં.માં સૌથી ઓછા 64,730 મતદારો છે.
