અમદાવાદમાં વીજળીનાં કડાકા ભડાકા સાથે સરેરાશ 2 ઇંચ વરસાદ

ન્યૂઝ18 ગુજરાતી : અમદાવાદમાં હાલ વીજળીનાં કડાકા ભડાકા સાથે મુશળધાર વરસાદ વરસી રહ્યો છે. અમદાવાદમાં સાર્વત્રિક વરસાદ દરેક જગ્યાએ પાણી જ પાણી ભરાયું છે. વાસણા બેરેજનાં 4 દરવાજા ખોલી દેવામાં આવ્યાં છે. વરસાદનાં આંકડાની વાત કરીએ તો શહેરમાં બે કલાકમાં સરેરાશ 2 ઇંચ વરસાદ નોંધાયો છે. અમદાવાદનાં પૂર્વ વિસ્તારણાં 61 મિમી એટલે 2.44 ઇંચ વરસાદ ખાબક્યો છે. જ્યારે મધ્ય ગુજરાતમાં 39 મિમી, ઉત્તર ગુજરાતમાં 37 મિમી જ્યારે દક્ષિણ ગુજરાતમાં 2.55 ઇંચ વરસાદ નોંધાયો છે. અમદાવાદની સાથે ગાંધીનગરમાં પણ ધોધમાર વરસાદ વરસી રહ્યો છે.

અમદાવાદનાં વેજલપુર, વસ્ત્રાપુર, શ્યામલ, રાણીપ, ગોતા, હાટકેશ્વર, નારોલ, ચેનપુર, અમરાઇવાડી, નરોડા, વટવામાં ધોધમાર વરસાદ વરસતા અનેક જગ્યાએ પાણી ભરાયા છે. જેના કારણે લોકોને હાલાકીનો સામનો કરવો પડી રહ્યો છે. શહેરમાં કાડા ડિબાંગ વાદળો છવાતા અંધારપટ જેવી સ્થિતિ બની ગઇ છે.

શહેરમાં વીજળીનાં કડાકા ભડાકા અને ભારે પવન સાથે વરસાદ વરસી રહ્યો છે. લોકોને કામ વગર બહાર ન જવા માટે અપીલ કરવામાં આવી છે. સીટીએમ વિસ્તારમાં અનેક ઘરોમાં પાણી ભરાયા છે.

નોંધનીય છે કે શહેરમાં સોમવારે મોડી સાંજે છૂટાછવાયા ઝાપટાં પડ્યા હતા. સૌથી વધુ વટવામાં એક ઇંચ વરસાદ પડ્યો હતો. જ્યારે રાણીપ, બોડકદેવ, નરોડા, મેમ્કો સહિતના વિસ્તારોમાં અડધો ઈંચ વરસાદ પડ્યો હતો. શહેરમાં સરેરાશ 9 મીમી વરસાદ પડ્યો હતો. સિઝનનો અત્યાર સુધી કુલ વરસાદ 25.22 ઈંચ નોંધાયો છે.

રાજસ્થાનમાં સ્થિર થયેલાં મોન્સુન ટ્રફની અસરથી છેલ્લાં પાંચ દિવસથી અમદાવાદ સહિત રાજ્યમાં હળવાથી ભારે વરસાદી ઝાપટા પડી રહ્યાં છે. આગામી ચાર દિવસો દરમિયાન શહેર ઉપરાંત રાજ્યનાં અનેક વિસ્તારોમાં ભારે વરસાદની આગાહી કરવામાં આવી છે.

અમદાવાદનાં મોટાભાગનાં વિસ્તારોમાં ભારે વરસાદનાં કારણે રોડ પર પાણી ભરાયા છે. વિઝીબિલિટી ઘટતા વાહનચાલકોને મુશ્કેલી પડી રહી છે.