Gujarat Summer forecast: આ ઉનાળામાં કાળઝાળ ગરમી માટે રહેજો તૈયાર, જાણો હવામાન વિભાગે શું કરી મોટી આગાહી

વિભુ પટેલ, અમદાવાદ: ઉનાળાની (Gujarat Summer 2022) શરૂઆત થઈ ગઈ છે. જોકે વહેલી સવારે ઠંડી અને બપોરે ગરમીનો અહેસાસ થઈ રહ્યો છે. માર્ચ મહિનાથી તાપમાનમાં ધીમે ધીમે વધારો થશે અને ઉનાળાની ગરમીનો અનુભવ થવાનો શરૂ થઈ જશે. કોઈપણ ઋતુ શરૂ થાય તે પહેલાં ભારત હવામાન વિભાગ દ્વારા પૂર્વાનુમાન જાહેર કરવામાં આવે છે. ત્યારે ઉનાળાની શરૂઆત થતા જ અનુમાન લગાવવામાં આવ્યું છે કે, લઘુતમ અને મહત્તમ તાપમાન સામાન્ય કરતા વધુ રહેવાની ધારણા છે.

ભારત હવામાન વિભાગ દ્વારા પૂર્વાનુમાન લગાવ્યું છે કે, માર્ચથી મેં મહિનામાં ઉત્તર પશ્ચિમ ભારતના ઘણા ભાગો, ઉત્તરપૂર્વીય ભારતના મોટાભાગના ભાગો, મધ્ય ભારત અને પૂર્વીય દરિયાકાંઠાના પ્રદેશો અને હિમાલય નદી કિનારે કેટલાક વિસ્તારોમાં લઘુત્તમ તાપમાન સામાન્ય અથવા સામાન્ય કરતાં વધુ રહેવાની શક્યતા છે.

તો મહત્તમ તાપમાન પશ્ચિમ ભારત અને મધ્ય ભારતથી આગળ, ઉત્તર પશ્ચિમ ભારત અને ઉત્તરપૂર્વ ભારતના ઉત્તરીય ભાગોમાં ઘણા વિસ્તારો સામાન્ય કરતા વધારે રહેવાની ધારણા છે.

હવામાન વિભાગના ડાયરેક્ટર મનોરમાં મોહન્તિએ જણાવ્યું છે કે, ઉનાળા ઋતુ શરૂઆત થતા પૂર્વાનુમાન જાહેર કરવામાં આવ્યું .જેમાં માર્ચથી લઈને મેં મહિનામાં તાપમાન કેટલું રહેશે તેને લઈને અનુમાન લગાવવામાં આવ્યું છે.ત્યારે ગુજરાતમાં ઉનાળામાં કાળઝાળ ગરમી પડશે.

કારણ કે, રાત્રી અને દિવસ બંને તાપમાન સામાન્ય કરતા ઊંચું રહેવાનનું અનુમાન છે. જેના કારણે ઉનાળામાં કાળઝાળ ગરમીનો અહેસાસ થશે.

ગુજરાતમાં ઉનાળાની શરૂઆત થઈ ગઈ છે. જોકે માર્ચ મહિનાની શરૂઆતમાં મહત્તમ તાપમાન 35 ડીગ્રીએ પહોંચ્યું છે. હવામાન વિભાગનું કહેવું છે કે, અત્યારે તાપમાન સામાન્ય છે. માર્ચના અંત સુધીમાં સામાન્ય રીતે 40 ડીગ્રી આસપાસ તાપમાન રહેતું હોય છે.

પરંતુ પૂર્વાનુમાન કહી રહ્યું છે કે, ચાલુ વર્ષનો ઉનાળો આકરો રહેશે અને ગુજરાતમાં પણ સામાન્ય કરતા વધુ તાપમાન નોંધાશે. જોકે દરેક જિલ્લાના અલગ અલગ તાપમાન રહેતું હોય છે અને અલગ અલગ વિસ્તારના માપદંડ અલગ હોય છે. પરંતુ સરેરાશ કહીએ તો ગરમી વધુ પડશે તેવી હવામાન વિભાગે આગાહી કરી છે.