રાજ્યના 25 જિલ્લા અને 3 મનપામાં આજે COVIDના શૂન્ય કેસ, બાકીના શહેર-જિલ્લામાંથી ફક્ત 30 નવા કેસ

અમદાવાદ : રાજ્યમાં કોરોના વાયરસની (Coronavirus Second Wave) બીજી લહેર અસ્ત થઈ ગઈ છે. હવે ફક્ત ઔપચારિક દૃષ્ટીએ ટેસ્ટ કરવામાં આવી રહ્યા છે અને મોટી સંખ્યામાં થતા ટેસ્ટ છતાં પણ છેલ્લા કેટલાય દિવસથી રાજ્યમાં ફક્ત 30-40ની વચ્ચે નવા કેસ નોંધાઈ રહ્યા છે. દરમિયાન આજે કોરોના વાયરસના નવા ફક્ત 30 કેસ નોંધાયા છે.

આજે રાજ્યના 25 જિલ્લા અને 3 મહાનગરોમાં કોરોના વાયરસના શૂન્ય કેસ નોંધાયા છે. જ્યારે બાકીના 8 જિલ્લા અને 5 મહાનગરોમાંથી મળીને રાજ્યના કુલ 30 કેસ નોંધાયા છે. જેની સામે આજે 57 દર્દીઓ સાજા થઈ ગયા છે. રાજ્યમાં કોવીડના કારણે આજે એક પણ મોત નથી.

રાજ્યમાં એક્ટિવ કેસનો આંકડો પણ રેકોર્ડબ્રેક તળિયે પહોંચી ગયો છે. ફક્ત 285 એક્ટિવ કેસ અને 05 વેન્ટિલેટર દર્દી સાથે રાજ્યમાં રિકવરી રેટ 98.74 ટકાએ પહોંચી ગયો છે. રાજ્યમાં કોરોના વાયરસથી થયેલા મોતનો આંકડો 10,0076 પર સ્થિર છે.

અત્યારસુધીમાં કુલ 3.21,75,416 વ્યક્તિઓને કોરોનાની રસી આપવામાં આવી છે જેમાં આજે 3,59, 164 નવા વ્યક્તિઓને રસી મળી છે. આજે સૌથી વધુ અમદાવાદ શહેરમાં 44484 વ્યક્તિઓને રસી આપવામાં આવી છે આમ દિનપ્રતિદિન કોરોનાની રસી આપવામાં રાજ્યમાં સંખ્યા વધી રહી છે. રાજ્યમાં બંને ડોઝની રસી અપાઈ ગઈ હોય તેવા લોકોની સંખ્યા 71 લાખ પર પહોંચી છે જે મોટો આંકડો છે.