ખેતરના શેઢે નીલગિરી વાવીને આ ખેડૂત ચાર વર્ષે કોઈ વિશેષ માવજત વગર મેળવશે આઠ લાખ રૂપિયાની આવક!

પંકજ શર્મા, અમદાવાદ: અમદાવાદ જિલ્લાના દસક્રોઈ તાલુકાના ભરકુંડા (Bharkunda Village- Ahmedabad)ના ખેડૂત સંજયભાઈ પટેલે તેમના ખેતરમાં શેઢા પર નીલગિરી (Eucalyptus)નું વાવેતર કરી વધારાની આવક મેળવવાનું આયોજન હાથ ધર્યું છે. સંજયભાઈ 40 વીઘા જમીન ધરાવે છે. સામાન્ય રીતે તેઓ ડાંગર અને ઘઉંની ખેતી કરે છે. પરંતુ વન વિભાગ (Forest Department)ના માર્ગદર્શન હેઠળ તેમણે નીલગિરીના 700થી વધુ રોપાનું વાવેતર કર્યું છે. સંજયભાઈએ નવ મહિના પહેલા આ રોપાનું વાવેતર કર્યું હતું. ખેડૂત (Farmers)નો આ વાવેતરનો લાભ ચાર વર્ષના અંતે મળશે. ચાર વર્ષે આ ખેડૂતને નીલગિરીના વાવેતર બદલ લાખો રૂપિાયની આવક મળશે.

શેઢા પર નીલગિરીનું વાવેતર કરવા પાછળના ઉદેશ્ય અંગે જણાવતા સંજયભાઈ પટેલ કહે છે કે, 'શેઢા પર કોઇપણ પ્રકારની દવા, ખાતર કે પાણીની જરુર પડતી નથી. વળી, વૃક્ષને વધુ માવજતની પણ આવશ્યકતા પણ નથી. આ વાવેતરનો લાભ મને ચાર વર્ષે થશે. જે મારી ખેતી સિવાયની વધારાની આવક હશે.'

ખેડૂતના જણાવ્યા પ્રમાણે નીલગિરીના એક છોડની અંદાજે 1,200 રૂપિયા જેટલી કિંમત મળે છે. એટલે કે ચાર વર્ષ પછી પણ જો આટલી જ કિંમત મળતી હશે તો તેમને 700 નીલગિરીના છોડ બદલ આશરે 8,40,000 રૂપિયા જેટલી અંદાજિત આવક મળશે.

સંજયભાઈને વન વિભાગ તરફથી માહિતી મળી હતી કે શેઢા-પાળા પર વૃક્ષોનું વાવેતર કરીને વધારાની આવક મેળવી શકાય છે. ત્યારબાદ તેમણે નર્સરીમાં જઈને નીલગિરીના ટીસ્યૂ કલ્ચર કરેલા રોપા લઈને તેનું વાવેતર કર્યું. તેઓ કહે છે કે વન વિભાગની નર્સરીમાંથી તે પ્રતિ છોડ રૂપિયા 6ના દરે રોપા લાવ્યા હતા.

સંજયભાઈ ખેડૂતોને અપીલ કરતા કહે છે કે આપણા ખેતરોમાં શેઢા પર જમીન પડતર રહે છે, તેનો ઉપયોગ કરીને આપણે વધારાની આવક મેળવી શકીએ છીએ. ઉલ્લેખનીય છે કે વડાપ્રધાન મોદીએ 2022 સુધીમાં ખેડૂતોની આવક બમણી કરવાનું લક્ષ્યાંક રાખ્યું છે. ખેડૂતો પરંપરાગત ખેતી સાથે આ પ્રકારની વૈકલ્પિક ખેતી કરી પ્રધાનમંત્રીના લક્ષ્યાંકને સિદ્ધ કરવા સહભાગી થઈ શકે છે.