ફોટા જોઇને નહીં થાય વિશ્વાસ કે આ છે અમદાવાદની સરકારી શાળા, કોરોનાકાળમાં પ્રિન્સિપાલે બનાવ્યું વર્ટિકલ ગાર્ડન

સંજય ટાંક, અમદાવાદ: જો વિદ્યાર્થીઓ ને પુસ્તકિયું જ્ઞાન આપવાની જગ્યાએ પ્રેક્ટિકલ જ્ઞાન આપવામાં આવે તો, વિદ્યાર્થીઓનો સર્વાંગી વિકાસ (Overall Development) કંઈક અલગ જ થાય. આવું જ કંઈક વિચારી અમદાવાદની (Ahmedabad Jodhpur primary school) જોધપુરની પ્રથમિક શાળાના શિક્ષકે અનોખી પહેલ કરી છે. સરકારી શાળાના પ્રિન્સિપાલએ પોતાની શાળામાં વર્ટિકલ ગાર્ડન (Verticle garden) બનાવ્યો છે.

વિદ્યાર્થીઓને પર્યાવરણના પાઠ આસાનીથી સમજાવી શકાય તે હેતુથી આ ગાર્ડન બનાવવામાં આવ્યો છે. અમદાવાદના મધ્યમા જોધપુર ગામમાં આવેલી જોધોપુર પ્રાથમિક સ્કૂલ નંબર 1ના (Jodhpur Primary School 1)  પ્રિન્સિપાલએ કોરોના કાળનો (CoronaVirus) સદઉપયોગ કરી સ્કૂલમાં વર્ટિકલ ગાર્ડન બનાવી આખી સ્કૂલને ગ્રીન કરી દીધી છે.

લોકોના દિમાગમાં સરકારી સ્કૂલની છબી હોય છે તે છબીને તોડી સરકારી શાળા પણ ઉત્તમ અને સુંદર સ્કૂલ હોઈ શકે તેવું ઉદાહરણ જોધપુર પ્રાથમિક સ્કૂલના પ્રિન્સિપાલે આપ્યું છે. આ સ્કૂલમાં 500 કરતા વધારે નાના મોટા છોડ અને વૃક્ષ છે જે વિદ્યાર્થીઓને પર્યાવરણના પાઠ શિખવવામાં પ્રેક્ટિકલી ખુબ જ ઉપયોગી બનશે તેવું પ્રિન્સિપાલનું માનવું છે.

માત્ર પર્યાવરણના પાઠ જ નહીં સ્કૂલમાં પડેલી બોટલો, ડબ્બાઓને કાપી તેમાં છોડ રોપી વેસ્ટમાંથી બેસ્ટ બનાવી શકાય તેવો પ્રયાસ પણ કરાયો છે. આખા જોધપુર પ્રાથમિક સ્કૂલ વર્ટિકલ ગાર્ડન ધરાવતી અમદાવાદમાં આ પહેલી સ્કૂલ હશે.

શાળાના પ્રિન્સિપાલએ ન્યૂઝ18 ગુજરાતી સાથેની ખાસ વાતચીતમાં  જણાવ્યું કે, શાળામાં અભ્યાસની સાથે વર્ટીકલ ગાર્ડન, જૈવિક ખાતર, વિજ્ઞાન ગણિત પ્રદર્શનમાં તે કૃતિ મુકવામાં આવી. આ ઉપરાંત શાળામાં બહારની વસ્તુ ન ખાવા માટે ખાસ જુંબેશ અપનાવવામાં આવે છે. શાળામાં વિદ્યાર્થીઓને સૂકા કચરાનો ઉપયોગ કેવી રીતે કરવો તેનું જ્ઞાન પણ આપવામાં આવે છે.

મહત્વનું છે કે, આજકાલ ગ્લોબલ વોર્મિંગ અને તેની અસરોથી સૌ કોઈ પરિચિત છે. જોધપુર સ્કૂલના પ્રિન્સિપાલનું કહેવું છે કે, પર્યાવરણનું જતન કરવું આપણી ફરજ છે. આવનારી પેઢી એવા બાળકો પણ પર્યાવરણનું જતન કરતા શીખે તે જરૂરી છે.