AMTS-BRTS શરૂ થતા જ લોકોનાં મગજમાંથી કોરોના ગયો? ગાઈડલાઈનની ઐસીતૈસી કરીને લોકો વળ્યા ટોળે

વિભુ પટેલ, અમદાવાદ : આજથી  (Ahmedabad) બીઆરટીએસ (BRTS) અને એએમટીએસ (AMTS) શરૂ કરી દેવામાં આવી છે. સવારના 6થી રાત્રીના 11 વાગ્યા સુધી બસ સેવા ચાલુ રહેશે. એએમટીએસ દ્વારા કુલ 149 રૂટ ઉપર કુલ 700 બસ તેમજ બીઆરટીએસ દ્વારા 13 રૂટ પર 222 જેટલા બસ પરિવહન શરૂ કરવામાં આવ્યા છે. ત્યારે કોવિડ ગાઇડલાઇન્સનું ચુસ્ત પાલન કરવા માટે કહેવામાં આવ્યુ છે પરંતુ આ માત્ર વાતો જ સાબિત થઇ છે. આજ સવારથી શરૂ થયેલી એએમટીએસ અને બીઆરટીએસની બસોમાં લોકો બેસવા માટે એટલા ઉતાવળા હતા કે કોરોનાને જ ભૂલી ગયા અને સોશિયલ ડિસ્ટન્સિંગનાં લીરેલીરા ઉડાવતા જોવા મળ્યાં છે.

જોકે, લોકો તો ભાન ભૂલ્યા પરંતુ તંત્ર પણ પોતાની ગાઇડલાઇન ભૂલીને માત્ર  50 ટકા લોકોને  બસમાં બેસાડવાની અને કોઇને ઉભા ન રહેવા દેવાની વાત પણ ભૂલ્યું છે.

નિયમ પ્રમાણે, એએમટીએસ અને બીઆરટીએસ બસ સ્ટેશન ઉપર પ્રવાસીઓએ સોશિયલ ડિસ્ટન્સીંગ પાલન ફરજીયાત કરવાનું છે. બસમાં મુસાફરી કરતી વખતે પ્રવાસીએ માસ્ક ફરજીયાત પહેરવાનું રહશે. બસની મુસાફરીમાં બસની કેપેસિટી કરતા 50 ટકા પ્રવાસીઓ બેસાડવાના છે. એક પણ પ્રવાસી ઉભો રહી શકે.

જોકે, બીઆરટીએસ બસમાં સોશિયલ ડિસ્ટન્સીંગના ધજાગરા ઉડતા જોવા મળ્યા છે. બીઆરટીએસમાં પ્રવાસીઓ કેપેસિટી કરતા પણ વધારે જોવા મળ્યા. સીટીંગ વ્યવસ્થા પર તો પ્રવાસી બેઠા હતા. પરંતુ બસમાં પ્રવાસીઓ ઉભા રહીને પણ પ્રવાસ કરતા હતા. જેના કારણે અંતર જળવાયું ન હતું અને ગાઈડલાઈનની ઐસીતૈસી થઈ ગઈ. જોકે, લોકોએ પોતે સમજીને અંતર જાળવવાનું છે.

ગાઇડલાઇન પ્રમાણે, ડ્રાઈવર અને કંટકટર જે પણ સૂચના આપે તેનું પ્રવાસીઓએ પાલન કરવાનું છે પણ પ્રવાસીઓ કંટકટરની સુચનનું પાલન કરતા નથી. અને બાસમાં કેપેસિટી કરતા પણ વધુ પ્રવાસી બેસી જાય છે.

જો આ જ રીતે લોકો ભીડ કરશે તો કોરોના કેવી રીતે જશે. કોરાના અટકવાને બદલે કૂદકેને ભૂસકે વધશે.  કહેવત છે ને કે ચેતતો નર સદા સુખી તો એ પ્રમાણે જો ચેતીને કોરોનાથી લડીશું તો જ એને હરાવી શકીશું.

અમદાવાદ શહેરમાં લૉકડાઉન અને અનલોકના પગલે શહેરની ટ્રાન્સપોર્ટ સેવા બીઆરટીએસ અને એએમટીએસ છેલ્લા પાંચ મહિનાથી બંધ હતી. લોકોમાં અનેક છુટછાટ અને નિયમ પાલન સાથે કન્ટેઇમન્ટ ઝોન બાદ કરતા રૂટ પર ટ્રાન્સપોર્ટ સેવા શરૂ કરાઇ હતી.