Army Choper Crash: CDS બિપિન રાવતના પત્ની મધુલિકા રાવત વિશે જાણો 8 ખાસ વાતો

8  ડિસેમ્બરનાં તમિલનાડુમાં થયેલા Mi-17V5 ચોપર ક્રેશ (Mi-17V5 crash) થતા દેશને ગમગીનીમાં ડુબાડી દીધો છે. બુધવારે બપોરે બનેલી આ દુર્ભાગ્યપૂર્ણ ઘટનામાં દેશના CDS જનરલ બિપિન રાવત (CDS General Bipin Rawat) અને તેમના પત્ની મધુલિકા રાવત (Madhulika Rawat) સહિત 13 લોકોના દુ:ખદ મોત થયા છે. બિપિન રાવત જ્યારે વિલિંગ્ટનમાં ડિફેન્સ સર્વિસ સ્ટાફ કોલેજમાં લેક્ચર આપવા જઈ રહ્યા હતા, ત્યારે ચોપર તેના મુકામ પર પહોંચવાના થોડા જ અંતર પહેલા ક્રેશ થયું અને તેમાં સવાર તમામ લોકો આ દુર્ધટનાનો ભોગ બન્યા હતા. બિપિન રાવતના પત્ની મધુલિકા રાવત આર્મી વાઈફ વેલફેર અસોશિએશન (Army Wives Welfare Associatio)ના પ્રમુખ હતા અને સોશિયલ વર્કમાં પણ ઘણા જ એક્ટિવ હતા. મધુલિકા રાવત વિશે જાણવા જેવી 8 વાતો

1. મધ્ય પ્રદેશના શાહદોલના વતની મધુલિકા રાવતના લગ્ન 1986માં બિપિન રાવત સાથે થયા હતા. આ લગ્નથી તેમને 2 દીકરીઓ પણ છે, જેમાંથી એક મુંબઈ રહે છે અને બીજી દીકરી તેમની સાથે જ દિલ્લીમાં રહેતી હતી.

2. મધુવિકા રાવતે તેમનું પ્રારંભિક શિક્ષણ ગ્વાલિયરની સિંધિયા કન્યા વિદ્યાલયમાં કર્યો અને ત્યાર બાદ દિલ્લી યૂનિવર્સિટીમાંથી તેમણે સાઈકોલોજીનો અભ્યાસ કર્યો.

3. મધુલિકાના લગ્ન બિપિન રાવત સાથે થયા ત્યારે બિપિન રાવત સૈન્યમાં કેપ્ટન તરીકે ફરજ બજાવતા હતા.

4. મધુલિકા રાવતનો પરિવાર હાલમાં શાહદોલના રાજબાગમાં પોતાના પૈતૃક નિવાસસ્થાને રહે છે.

5. મધુલિકાના પિતા મૃગેન્દ્ર સિંહ શાહદોલ જીલ્લાના સોહાગપુર રિયાસતના રિયાસતદાર હતા. આ સાથે જ 1967 અને 1972માં તે જીલ્લામાં કોંગ્રેસના ઘારાસભ્ય પણ રહી ચૂક્યા છે.

6. છત્તીસગઢના મંત્રી ટીએસ સિંધદેવ દ્વારા જણાવવામાં આવ્યું કે મધુલિકા રાવત તેમના પરિવારના ખૂબ નજીક હતા અને તેમને મળવા ઘણી વખત ભોપાલ પણ આવતા હતા. તેમણે પોતાની ટ્વિટમાં જણાવ્યું કે મધુલિકાજી પરિવારના ખૂબ જ નજીક હતા. તે સુહાગપુરના સ્વ. શ્રી મૃગેન્દ્ર સિંહના પુત્રી હતા અને ઘણી વખત અમને મળવા ભોપાલ આવતા હતા. તેમના પરિવારો માટે હું ખૂબ દુખ અનુભવું છું. આ દુખદ ઘટનાનો સામનો કરવાની ભગવાન તેમને શક્તિ આપે.

7. આર્મી વાઈફ વેલફેર અસોસિયેશનના પ્રમુખ હોવા સિવાય પણ આર્મી ઓફિસરોની વિધવાઓ માટેના કેટલાક મહત્વના વેલફેર પ્રોગ્રામમાં પણ તેમણે અગત્યની ભૂમિકા ભજવી હતી.

8. મધુલિકા રાવતના ભાઈ યશવર્ધન સિંહ દ્વારા કહેવામાં આવ્યું કે, તે બિપિન રાવતને અંતિમ વખત દશેરાના દિવસે દિલ્લીમાં મળ્યા હતા. આ વખતે બિપિન રાવતે તેમને વાયદો પણ આપ્યો હતો કે તે મધુલિકાના પૈતૃક ગામ શાહદોલમાં પણ આવશે અને ત્યાં એક સૈનિક શાળા ખોલાવવાનો પણ વિચાર કરશે.