ઘરે બનાવો બજાર જેવી 'ખારી શીંગ', નોંધી લો આ સરળ Recipe

લાઇફ સ્ટાઇલ ડેસ્ક: ઘણી વખત જો ક ટાઇમે ભુખ લાગે તો આપણે ગમે તે ખાઇ લઇએ છીએ. આવા સમયે જો હેલ્ધી નાસ્તો કરવામાં આવે તો શરીર સ્વસ્થ રહે છે અને ચરબી વધતી પણ નથી. એવામાં સરળ અને સહેલાઇથી બની જાય તેવી ખારી શીંગની રેસીપી અમે તમારા માટે લઇને આવી ગયા છીએ. ચાલો ત્યારે નોંધી લો બજારમાં મળતી ખારી શીંગની રેસીપી. તેમજ આ વાત જાણી લો કે, બજારમાં મળતી ખારી શીંગ રેતીમાં શેકેલી હોય છે, જેનાથી ભવિષ્યમાં કેન્સર પણ થઈ શકે છે.

ખારી શીંગ બનાવવા માટે જરૂરી સામગ્રી- અડધો કીલો શીંગદાણા(વીણીને સાફ કરેલાં, ફોતરા નહીં કાઢવાના), એક કીલો મીઠું અને અડધા લીટર જેટલું પાણી

રીત : સૌ પ્રથમ એક વાસણમાં અડધો લીટર પાણીમાં બે ચમચા મીઠું નાખીને ગરમ કરવા મૂકો. ઉકળે એટલે ગેસ બંધ કરી ને શીંગદાણા પાણીમાં ઉમેરી દો. હવે તેને ઢાંકીને અડધો કલાક મુકી રાખો. પછી ચાળણીમાં શીંગદાણા નિતારી લો અને પંખા નીચે સુકવવા માટે મુકી રાખો.

હવે એક કઢાઈમાં (જાડું વાસણ,લોખંડનું કે પીત્તળનું ,નોન-સ્ટીક નહીં. ) એક કીલો જેટલું મીઠું (ઓછું વધારે ચાલે) ગરમ કરવાં મુકો,થોડી વારે હલાવતા રહો. . સારી રીતે ગરમ થઈ જાય એટલે એમાં સુકવેલાં શીંગદાણા એડ કરો, હવે આ શીંગદાણાને ધીમાં તાપે શેકો. આ સમયે તેને સતત હલાવતાં રહો.

સરસ ગુલાબી રંગ આવે એટલે ગેસ બંધ કરી થોડી વાર એમ જ હલાવતાં રહો. પછી ચાળણીથી શીંગદાણા ચાળી લો, ઠંડા થાય એટલે એર-ટાઇટ બરણીમાં ભરી લેો. બજારમાં મળતી ખારી શીંગ રેતીમાં શેકેલી હોય છે, જેનાથી ભવિષ્યમાં કેન્સર પણ થઈ શકે છે. આ મીઠું પાછું વાપરી શકાય છે.