બિકીની પહેરીને પર્વતો પર સેલ્ફી લેવા માટે જાણીતી ગીગી વૂ ખીણમાં પડી જતાં મોત

તાઇપેઇ : "બિકીની ક્લાઇમ્બર" તરીકે પ્રસિદ્ધ થયેલી તાઇવાનની ગીગી વૂનું ખીણમાં પડી જવાથી મોત થયું છે. તાઇવાનની બચાવદળની ટીમે તેનો મૃતદેહ ખીણમાંથી બહાર કાઢવા માટે પ્રયાસો હાથ ધર્યા છે. ગીગી બિકીની પહેરીને પર્વતોની ટોચ પર સેલ્ફી લેવા માટે જાણીતી હતી. તે અવાર નવાર સોશિયલ મીડિયા પર તેની આવી તસવીરો પોસ્ટ કરતી હતી.

ગીગીના પ્રશંસકોએ તેને "બિકીની ક્લાઇમ્બર"નું હુલામણું નામ આપ્યું હતું. શનિવારે ગીગીએ તેના મિત્રોને સેટેલાઇટ ફોનમાંથી કોલ કરીને માહિતી આપી હતી કે તે તાઇવાનના યાશન નેશનલ પાર્ક ખાતે એક ખીણમાં નીચે પડી ગઈ છે અને ખૂબ જ ખરાબ રીતે ઘાયલ થઈ છે.

આ અંગેની જાણ કરવામાં આવતા રેસ્ક્યૂ ટીમ ગીગીને મદદ માટે હેલિકોપ્ટર સાથે પહોંચી હતી. જોકે, વાતાવરણ ખરાબ હોવાને કારણે બચાવદળના સભ્યો કંઈ વધારે મદદ કરી શક્યા ન હતા. સોમવારે રેસ્કયૂ ટીમને ખીણમાંથી ગીગીનો મૃતદેહ મળી આવ્યો હતો.

આ અંગે ફાયર તેમજ રેસ્કયૂ ઓફિસરે મીડિયાને જણાવ્યું કે, "હાલ આ પર્વત પર વાતાવરણ ખૂબ જ ખરાબ છે. અમે હાલ બચાવદળના સભ્યોને ગીગીનો મૃતદેહ વધારે ખુલ્લી જગ્યામાં લઈ જવા કહ્યું છે. જ્યારે વાતાવરણમાં સુધારો થશે ત્યારે અમે હેલિકોપ્ટરથી તેનો મૃતદેહ નીચે લાવીશું."

સૂત્રોના જણાવ્યા પ્રમાણે ગીગીએ તેના મિત્રોને ફોન કરીને કહ્યું હતું કે તેણી 20-30 મીટર ઊંડી ખીણમાં પડી ગઈ છે. નીચે પડવાને કારણે તેણીના શરીરના કમરથી નીચેના ભાગમાં ઈજા પહોંચી છે. તે હલનચલન કરી શકતી નથી પરંતુ તે વાતચીત કરી શકે છે.

જોખમી સ્ટન્ટ કરીને મીડિયામાં ચર્ચામાં રહેતી લીલી દુર્ઘટનાનો શિકાર બની હોય તેનું તાજેતરનું ઉદાહરણ છે. ગયા અઠવાડિયા કેલોફોર્નિયાના યોશેમાઇટ નેશનલ પાર્કમાંથી ભારતીય દંપતીનો મૃતદેહ મળ્યો હતો. બંનેનું ખીણમાં પડી જવાથી મોત થયું હતું. મીડિયા રિપોર્ટ પ્રમાણે બંને સેલ્ફી લેવાના ચક્કરમાં નીચે ગબડી ગયા હતા.

મૃતક 36 વર્ષીય ગીગી વૂ ન્યૂ તાઇપેઇ શહેરમાં રહેતી હતી. તે અવાર નવાર સોશિયલ મીડિયામાં તસવીરો પોસ્ટ કરતી હતી જેમાં તે પર્વતોની ટોચ પર બિકીની પહેરેલી જોવા મળતી હતી.

પર્વતો પર ચઢાણ વખતે તે પર્વતારોહકો પહેરે તેવો પોશાક પહેરતી હતી. એક વખતે પર્વતની ટોચ પર પહોંચ્યા બાદ તેણી બિકીની પહેરીને ત્યાં તસવીરો ક્લિક કરાવતી હતી.

સ્થાનિક ન્યૂઝ ચેનલ એફટીવી સાથે ગયા વર્ષે વાતચીત કરતા ગીગી વૂએ જણાવ્યું હતું કે તેણીએ છેલ્લા ચાર વર્ષમાં આશરે 100 જેટલા પર્વતોનું ચઢાણ કર્યું છે.

ઇન્ટરવ્યૂમાં ગીગીએ જણાવ્યું હતું કે, "મેં દરેક પર્વત પર બિકીની પહેરીને તસવીર ક્લિક કરી છે. મારી પાસે 97 બિકીની જ હોવાથી મેં અમુક બિકીની ફરી વખત પહેરી હતી." તેણી શા માટે આવું કરે છે તેના જવાબમાં ગીગીએ જણાવ્યું હતું કે, "હું ખૂબ જ સુંદર છું, અને સુંદર લાગવામાં શું ખોટું છે."

પર્વત પરથી નીચે પડી ગયા બાદ બચાવદળના સભ્યોને તેની બોડી જ્યાં પડી હતી ત્યાં સુધી પહોંચવા માટે 28 કલાક લાગ્યા હતા. સતત ખરાબ વાતાવરણને કારણે બચાવકાર્યમાં આટલી વાર લાગી હતી.