107 વર્ષ જૂનું શેરડીનો રસ કાઢવાનું મશીન, દૂર દૂરથી લોકો આવી રહ્યા છે દિલખુશ રસ હાઉસ

સુરત: ઉનાળામાં કેલ્શિયમ, પોટેશિયમ, મેગ્નેશિયમ અને ફોસ્ફરસ જેવા પોષક તત્વોથી ભરપૂર શેરડીનો રસ પીવા માટે લોકોને લાઇન લાગતી હોય છે. ત્યારે સુરત શહેરના ઝાંપા બજાર વિસ્તારમાં આવેલ 112 વર્ષ જૂની દુકાનનો રસ પીવા લોકો દૂર દૂરથી આવે છે.

અહીંયા મળતા શેરડીના મીઠા રસની ખાસિયત એ છે કે શેરડીના રસ કાઢવા માટેનું જે મશીન છે તે 107 વર્ષ જૂનું છે અને તે બંદૂકના મેટલમાંથી બનાવવામાં આવ્યું છે. જેને કારણે માખી મચ્છરનો ઉપદ્રવ પણ આ મશીનની આસપાસ રહેતા નથી.

શરીરને પરસેવે રેબઝેબ કરી દેતી ગરમીમાં અમીર કે ગરીબ સૌ કોઈ મધમીઠા શેરડીના રસની મજા માણે છે અને ઠેર ઠેર જાહેર રસ્તાઓ પર લાકડાના મશીનથી લઈને અત્યાધુનિક મશીન વાળા સ્ટોલ કે ઠેલા જોવા મળે છે જ્યાં લોકો શેરડીનો રસ પીવા એકઠા થાય છે. ત્યારે મોટાભાગના સુરતીઓને ખબર નથી કે સુરતમાં સૌપ્રથમ શેરડીનો રસ વેચવાની શરૂઆત વર્ષ 1911માં ઝાંપા બજારમાં થઈ હતી.

સૌથી મહત્વની વાત એ છે કે અહીં રસ કાઢવાનું મશીન છે આ મશીન 107 વર્ષ જૂનું મશીન છે આ મશીન બંદૂકની બુલેટમાં જે મેટલ વપરાય છે તે મેટલમાંથી મશીન બનાવવામાં આવ્યું હતું.

મશીનની ખાસિયત એ છે કે, કોઈ પણ પ્રકારનો કાટ લાગતો નથી. એટલું જ નહીં રસ અને શેરડી બંને મીઠા હોવા છતાં અહીં માખી કે મચ્છર થતા નથી. વિદેશમાં વસેલા સુરતી લોકો જ્યારે પણ સુરત આવે ત્યારે અહીંયા આવીને મીઠા મધુર રસની મજા માણે છે.

વર્ષો પહેલાં લોકોને નેચરલ સ્વાસ્થ્યવર્ધક પીણું પીવા મળે તે માટે ઈબ્રાહીમ રાજભાઈ રસવાલા એ દિલખુશ રસ હાઉસ પેઢીની સ્થાપના કરી હતી. ત્યારે શેરડીનો રસ પૈસાદાર અને બહુ જૂજ મધ્યમવર્ગના લોકોનું પીણું ગણાતું હતું. પહેલા એક આનામાં રસનો ગ્લાસ મળતો પછી ચાર આનામાં મળતો થયો હતો ત્યારે આજે રસનો મોટો ગ્લાસ 20 રૂપિયા અને નાનો ગ્લાસ 10 રૂપિયામાં મળે છે.

આ અંગે માલિક જોહેરભાઈ એ જણાવ્યું હતું કે ,આ દુકાન સુરતના સૌથી જૂના મકાનો પૈકી એક છે અમે શેરડી ખાસ કરીને નાસિકથી મંગાવીએ છે. અહીંની દિવાલો પર વર્ષ 1968થી વર્ષ 2006 સુધી સુરતમાં પૂરની તસવીરો પણ જોવા મળશે. અત્યારે ચોથી પેઢી દુકાન સાંભળી રહી છે.

આ મશીન ગન મેટલનું બનેલું હોવાથી માખી કે મચ્છર થતા નથી અને મશીનને કાટ પણ લાગતો નથી. અમારે ત્યાં દુકાનમાં એક જૂનો પંખો છે જે અંગ્રેજોના સમયનો છે, આટલો જૂનો હોવા છતાં તેને એક પણ વાર રીપેર કરવો પડ્યો નથી.