કચ્છ : પોલીસની 'વીરાંગના'ઓએ બૂટલેગરોનો પ્લાન કરી નાખ્યો ચોપટ, દારૂનો માતબર જથ્થો ઝડપી પાડ્યો

મેહૂલ સોલંકી, કચ્છ : કચ્છમાં પોલીસની વિવિધ કામગીરીમાં વીરાંગના સ્ક્વૉડ ભુજ શહેરમાં અનેકવીધ કામગીરી કરી રહી છે. અલગ પ્રકારના કાયદાકીય કામો માટે તૈયાર કરવામાં આવેલી આ વીરાંગના સ્ક્વૉડે આજે વિદેશી દારૂનો મોટો જથ્થો ઝડપી પાડ્યો છે. બૂટલેગરોએ ધોળાદિવસે દારૂની હેરફેરનો પ્લાન બનાવ્યો હતો જેને આ મહિલા પોલીસ કર્મચારીઓએ ચોપટ કરી નાખ્યો છે.

વીરાંગના એટલે જે મહિલાઓ પોલીસ વિભાગમાં કોઈ અલગ જ પ્રકારની અને એકલ્સકલૂઝિવ કામગીરી કરતી હોય તેને કહેવાય છે. આજે સવારના સમયે પશ્ચિમ ક્ચ્છ વીરાંગનાના ટીમ દ્વારા ભુજના અલગ અલગ વિસ્તારોમાં પોતાની કામગીરી કરાઈ રહી હતી ત્યારે લખુરાઈ ચાર રસ્તા પાસે માસ્કનું ચેકીંગ કરતી આ વીરાંગનાના ટીમે એક ટેમ્પો પસાર થતા તેને રોકવાની કોશિષ કરી અને ટેમ્પામાં બેઠેલા ચાલકને માસ્કનો નિયમ સમજાવી દંડ ફટકાર્યો હતો.

ત્યારે ટેમ્પા ચાલક પાસે પૈસા નહોતા અને ટેમ્પો ચાલકે ત્યાંથી ભાગવાની કોશિષ કરતા આ વીંરાગના ટીમને શંકા ગઈ અને તેને પકડવા વીરાંગના ટીમની એક કર્મચારી તેનો પીછો કરી તેને પકડી પાડી સ્થળ પર ટેમ્પો પાસે લઈ આવી હતી. ત્યાર બાદ તે ચાલક સાથે ટેમ્પાની પણ તલાસી લેવાતા ઇંગ્લિશ દારૂની પેટીઓ મળી આવી હતી.

આ ટેમ્પોની તલાશી લેતા અંદર શાકભાજીની આડમાં દારૂનો જથ્થો છૂપાવવામાં આવ્યો હતો. બૂટલેગરો દ્વારા પોલીસને શંકા ન જાય તે માટે આ ખાસ પ્લાન તૈયાર કરવામાં આવ્યો હતો પરંતુ કચ્છ પોલીસની વીરાંગનાના હાથે ચઢી જતા બૂટલેગરોના અરમાનો પર પાણી ફરી વળ્યું હતું.

દરમિયાન આ તપાસમાં મળી આવેલા દારૂના જથ્થા સાથે વાગડ લખેલા ટેમ્પોને પોલીસ મથકે લઈ આવવામાં આવ્યો હતો. અંદાજીત 112 બોટલ વિદેશી દારૂની મળી આવતા વીરાંગના સ્ક્વૉડને ઉચ્ચ અધિકારી અને જિલ્લા પોલીસ વડાએ પણ અભિનંદ આપ્યા હતા.