Prag Mahal: કચ્છની ઐતિહાસિક વિરાસત સમા ‘પ્રાગ મહેલ’ની કહાણી, અનેક ફિલ્મોનું શૂટિંગ થયું

19મી સદીમાં ભારત દેશના ગુજરાત રાજ્યના કચ્છ જિલ્લામાં આવેલા ભુજ શહેરમાં પ્રાગ મહેલ બનાવવામાં આવ્યો હતો. આ બાંધકામની શરૂઆત રાવ પ્રાગમલજી ત્રીજાએ કરાવી હતી. (ફોટો ક્રેડિટઃ સત્યવિજયસિંહ ચુડાસમા, @solothinker_10)

આ મહેલની ડિઝાઇન કર્નલ હેનરી સેન્ટ વિલ્કિન્સ દ્વારા ઇટાલિયન ગોથિક શૈલીમાં કરવામાં આવી છે. આ મહેલના બાંધકામ માટે પણ ઇટાલીથી કારીગરો બોલાવવામાં આવ્યાં હતાં. તે સમયે કારીગરોને સોનાના સિક્કામાં મહેનતાણું આપવામાં આવ્યું હતું. સ્થાનિક કચ્છી કારીગરો પણ આ મહેલનાં બાંધકામમાં સામેલ હતા. (ફોટો ક્રેડિટઃ વિરેન્દ્રસિંહ પરમાર, @wildlife_with_viren)

આ મહેલ બાંધવા માટે રાવ પ્રાગમલજીએ તે સમયે અંદાજે 31 લાખ રૂપિયા જેટલો ખર્ચો કર્યો હતો અને વર્ષ 1879માં તેનું બાંધકામ પૂરું થયું હતું. (ફોટો ક્રેડિટઃ વિરેન્દ્રસિંહ પરમાર, @wildlife_with_viren)

આ મહેલની ખાસિયતો શું છે? - મુખ્ય ખંડ - દરબાર ખંડ - કોરિન્થિયન થાંભલા - યુરોપિયન વનસ્પતિઓ અને પ્રાણીઓની કોતરણીવાળું જાળીકામ - મહેલ પરિસરના પાછળના ભાગે આવેલું નાનકડું મંદિર (ફોટો ક્રેડિટઃ સત્યવિજયસિંહ ચુડાસમા, @solothinker_10)

બોલિવૂડની ‘હમ દિલ દે ચૂકે સનમ’ અને ‘લગાન’ જેવી પ્રખ્યાત મૂવીના શૂટિંગ આ મહેલમાં થયા છે. આ ઉપરાંત ઘણી ગુજરાતી મૂવીનું શૂટિંગ પણ અહીં કરવામાં આવ્યું છે. (ફોટો ક્રેડિટઃ વિરેન્દ્રસિંહ પરમાર, @wildlife_with_viren)

વર્ષ 2001માં આવેલા ભૂકંપમાં કચ્છમાં મોટા પ્રમાણમાં નુકસાન થયું હતું. ત્યારે પ્રાગ મહેલને પણ ખૂબ નુકસાન પહોંચ્યું હતું. તેટલું જ નહીં, વર્ષ 2006માં આ મહેલને લૂંટવામાં આવ્યો હતો. ચોરો તેમાંથી પ્રાચીન કલાકૃતિઓ લઈને ફરાર થઈ ગયા હતા અને મહેલમાં ઘણી તોડફોડ કરીને નુકસાન પહોંચાડ્યું હતું. (ફોટો ક્રેડિટઃ સત્યવિજયસિંહ ચુડાસમા, @solothinker_10)

પ્રાગ મહેલમાં પ્રવાસીઓ મુખ્ય ખંડમાંથી ટાવરના પગથિયા ચઢીને ઉપર જઈ શકે છે. જ્યાંથી આખુ ભુજ દેખાય છે. બોલિવૂડના દિગ્ગજ કલાકર અમિતાભ બચ્ચને આ મહેલના પુનઃનિર્માણમાં રસ લીધો હતો અને મહેલના કેટલાક ભાગનું સમારકામ કરાવવા માટે આર્થિક મદદ કરી હતી. (ફોટો ક્રેડિટઃ સત્યવિજયસિંહ ચુડાસમા, @solothinker_10)

પ્રાગ મહેલની મુલાકાત લેવા માટે સવારે 9.30 વાગ્યાથી સાંજના 5.45 વાગ્યા સુધી એન્ટ્રી આપવામાં આવે છે. આ ઉપરાંત આ સ્થળ ભુજ રેલવે સ્ટેશનેથી 2.6 કિલોમીટરના અંતરે આવેલું છે. જ્યારે ભુજના બસ ડેપોથી 1.3 કિલોમીટર દૂર આવેલું છે. તેથી ખૂબ જ સરળતાથી અહીં પહોંચી શકાય છે. (ફોટો ક્રેડિટઃ વિરેન્દ્રસિંહ પરમાર, @wildlife_with_viren)