Kutch: સરહદની સુરક્ષાની સાથે BSF કરે છે આવું અનોખું કામ, ગામની શાળાના વિદ્યાર્થીઓ ખુશ થઇ ગયા!

Dhairya Gajara, Kutch: ફર્સ્ટ લાઈન ઓફ ડિફેન્સ તરીકે ચોવીસે કલાક ખડેપગે તૈનાત રહી દેશની સુરક્ષા કરતી બોર્ડર સિક્યોરિટી ફોર્સ દ્વારા સીમાની રખવાળી સાથે સરહદી વિસ્તારમાં આવતા ગામોમાં સેવાકીય કાર્યો પણ હાથ ધરવામાં આવે છે. આવા જ સેવાકીય કાર્યોને આગળ ધપાવતા બીએસએફ દ્વારા કચ્છમાં બે અલગ અલગ સિવિક એક્શન પ્રોગ્રામમાં છ ગામોને રૂ. પાંચ લાખથી વધારેની જરૂરી સામગ્રી આપવામાં આવી હતી.

કચ્છમાં ફરજ બજાવતી બીએસએફની 59 અને 102 બટાલિયન દ્વારા લખપત અને અબડાસા તાલુકાના સરહદી ગામો માટે ખાસ આ સિવિક એક્શન પ્રોગ્રામનું આયોજન કરવામાં આવ્યું હતું.

બીએસએફની 59 બટાલિયન દ્વારા લખપત તાલુકાના કાનમેર ગામ ખાતે યોજાયેલ સિવિક એક્શન પ્રોગ્રામમાં તાલુકાના ગુનેરી, લખપત, કાનમેર, પુનરાજપુર અને ઉમરસર ગામની સરકારી શાળાઓને સહાય સામગ્રીનું વિતરણ કરવામાં આવ્યું હતું.

59 બટાલિયનના કમાન્ડન્ટ રાજેન્દ્ર સિંહ ખરદવાલ અને બીએસએફ આઇજી રવિ ગાંધીની હાજરીમાં આ ગામોની શાળાઓને રૂ. 3.35 લાખની કિંમતના સ્પોર્ટ્સ, સ્ટેશનરી, વોટર કૂલર, આર.ઓ., પાણીની ટાંકી તેમજ સેનીટેશન આઇટમો આપવામાં આવી હતી.

તો બીએસએફની 102 બટાલિયન દ્વારા અબડાસા તાલુકાના ચરોપડી ગામ ખાતે યોજાયેલ સિવિક એક્શન પ્રોગ્રામમાં ચરોપડી પ્રાથમિક શાળાને સ્પોર્ટ્સ, સ્ટેશનરી, પાણીની ટાંકી, સેનીટેશન આઈટમ તેમજ જરૂરી દવાઓ પણ આપવામાં આવી હતી.

આઇજી રવિ ગાંધી અને 102 બટાલિયનના કમાન્ડન્ટ મનીષ રંજન દ્વારા કુલ રૂ. 1.73 લાખની સામગ્રીનું વિતરણ કરવામાં આવ્યું હતું.

ચરોપડી ખાતે યોજાયેલ આ સિવિક એક્શન પ્રોગ્રામમાં અબડાસાના ધારાસભ્ય પ્રદ્યુમનસિંહ જાડેજા પણ ઉપસ્થિત રહ્યા હતા અને સરહદી ગામોની શાળાઓના વિકાસ માટે બીએસએફની આ પ્રેરણાદાયક પ્રવૃત્તિની સરાહના કરી હતી.