રાજકોટ મનપા ચૂંટણી: બીજેપી તરફથી મહિલા મતદાતાઓને આકર્ષવા હેર પીન, હેર રિંગ વગેરેનું વિતરણ

અંકિત પોપટ, રાજકોટ: રાજકોટ મહાનગરપાલિકા (Rajkot municipal corporation) સહિત રાજ્યની 6 મહાનગરપાલિકા માટે ચૂંટણી પ્રચાર પ્રસાર માટે હવે માત્ર ત્રણ દિવસ જ બાકી રહ્યા છે. આગામી 19 તારીખ શુક્રવારના રોજ સાંજે 5:00 વાગ્યાથી પ્રચાર (Election campaign) પડઘમ શાંત થઈ જશે. ત્યારે અંતિમ ત્રણ દિવસોમાં શક્ય એટલા વધુ મતદાતા (Voters)ઓ સુધી પોતાની વાત પહોંચાડવા માટે તમામ રાજકીય પક્ષો એડીચોટીનું જોર લગાવી રહ્યા છે. રાજકોટ શહેર ભાજપ (BJP) દ્વારા જુદા-જુદા વોર્ડમાં મહિલા મતદાતાઓને આકર્ષવા માટે પર્સ, હેર પીન, હેર રિંગ, હેર બટરફ્લાય સહિતની ચીજવસ્તુઓ પ્રચાર-પ્રસાર સમયે આપવામાં આવી રહી છે.

વોર્ડ નંબર એકમાં આવેલા રૈયાધાર વિસ્તારમાં આજ રોજ ભારતીય જનતા પાર્ટીના ઉમેદવારોએ પદયાત્રા કરી હતી. આ સમયે મહિલા મતદાતાઓને ભાજપનું બોરિયું, ભાજપનું બકલ, ભાજપની રિંગ તેમજ ભાજપનું પર્સ આપવામાં આવ્યાં હતાં.

અત્રે નોંધવી રહ્યું કે, અત્યારસુધી ભારતીય જનતા પાર્ટી દ્વારા નરેન્દ્ર મોદીનું માસ્ક, ભાજપની ટોપી તેમજ ભાજપના માસ્કનું વિતરણ કરવામાં આવી રહ્યું હતું. ત્યારે સ્લમ વિસ્તાર છે ત્યાં મહિલા મતદાતાઓને આકર્ષવા માટે આ પ્રકારે સુશોભનને લગતી ચીજવસ્તુઓ આપવામાં આવી રહી છે.

ઉલ્લેખનીય છે કે હાલ રાજકોટ મહાનગરપાલિકાના ચૂંટણી જંગમાં ભાજપના 72 ઉમેદવાર મેદાનમાં છે. તેની સામે આમ આદમી પાર્ટીના પણ 72 ઉમેદવાર મેદાનમાં છે. બીજી તરફ મતદાન પહેલા જ કૉંગ્રેસની બે વિકેટ પડી જતાં માત્ર 70 ઉમેદવાર મેદાનમાં છે. આગામી 23 તારીખના રોજ રાજકોટ મનપામાં કયા પક્ષનું શાસન આવશે તે જોવું મહત્ત્વનું બની રહેશે.

રાજકોટ મહાનગરપાલિકાની સ્થાપનાથી આ જ દિવસ સુધી માત્ર પાંચ વર્ષ પૂરતું કોંગ્રેસનું શાસન આવ્યું છે. બાકીના તમામ વર્ષ માટે ભારતીય જનતા પાર્ટી દ્વારા જ મહાનગરપાલિકાનું શાસન સંભાળવામાં આવ્યું છે.