હરીન માત્રાવડિયા, રાજકોટ : શહેરમાં અગાઉ પણ વિદેશી નાગરિકો સાથે છેતરપિંડી કરતા કોલ સેન્ટરો પકડાઇ ચૂક્યા છે, ત્યારે હવે રાજકોટ ક્રાઇમ બ્રાન્ચે સૌરાષ્ટ્રના અત્યાર સુધીના સૌથી મોટા કોલ સેન્ટરને ચલાવતી ગેંગ ઝડપી પાડી છે. પોલીસે આ ગેંગના નવ આરોપીઓની ધરપકડ કરી છે. આ ગેંગનો મુખ્ય સૂત્રધાર દેવેન્દ્ર ઉર્ફે નેનોની શોધખોળ શરૂ કરી છે. આ લોકો અમેરિકન નાગરિકોને ફોન કરીને તેમનો સોશિયલ સિક્યોરિટી નંબર બ્લોક કરવાની ધમકી આપીને પૈસા પડાવતા હતા. આ માટે તેઓ એક સાથે પાંચ-છ હજાર લોકોનો વોઇસ મેસેજ મોકલતા હતા અને ખાસ સોફ્ટવેરનો ઉપયોગ કરતા હતા.
કઈ રીતે ગુના અચરતા હતા? : આ ગુનામાં પોલીસ પકડથી દૂર આરોપી દેવેન્દ્ર અમેરિકન નાગરિકોના મોબાઈલ નંબર અને ડેટા મેળવી ધીરેન રૂપે ચીકુને આપતો હતો. ધીરેન ઓફિસના લેપટોપમાંથી આ નંબર ઉપર 'તમે ગેરકાયદેસર કામ કરતા હોવાથી તમારો સોશિયલ સિક્યુરિટી નંબર રદ થશે. લોકલ પોલીસે અમને આ ઇન્ફોર્મેશન આપી છે. તમારા ઉપર કેસ થશે.' જો કેસ ન કરવો હોય તો વધુ વિગત માટે એક નંબર દબાવવાનું કહેતા હતા. આવું કરીને તેઓ યુએસ નાગરિકો પાસેથી 100-200 ડોલરના ગિફ્ટ વાઉચર પડાવી લીધા હતા. કોલ સેન્ટર ચલાવતા લોકો એક સાથે પાંચથી છ હજાર લોકોને વોઇસ મેસેજ મોકલતા હતા. આ માટે ખાસ સોફ્ટવેરનો ઉપયોગ કરતા હતા. જેનાથી અમેરિકન નાગરિકને એવું લાગતું હતું કે આ મેસેજ તેમને સ્થાનિક સ્તરેથી જ આવ્યો છે.
મહત્ત્વનું છે કે પોલીસે હાલ દસમાંથી નવ આરોપીઓની ધરપકડ કરી લીધી છે. હવે આ લોકો અન્ય કોઈ ગુનાહિત પ્રવૃત્તિ સાથે જોડાયેલા છે કે કેમ અને અત્યાર સુધીમાં આ લોકો દ્વારા કેટલી રકમની છેતરપિંડી કરવામાં આવી છે આ તમામ બાબતો અંગે પોલીસ વધારે તપાસ કરી રહી છે.
ધરપકડ કરવામાં આવેલા આરોપી : 1) ધીરેન ઉર્ફે ચીકુ કાટુઆ , મુંબઇ 2) સુમેર સોલંકી , મુંબઇ 3) વિક્રમ ગુપ્ટે , મુંબઇ 4) અતુલ ઇસ્ટવાલા , હરિયાણા 5) ઇર્ષાદ અલી , સાઉથ દિલ્હી 6) દીપ્તિ નારાયણ બીસ્ટ , મુંબઈ. અન્ય ત્રણ આરોપી સગીરવયના છે. આ મામલે મુખ્ય સૂત્રધાર દેવેન્દ્ર ઉર્ફે નેનો પોલીસ પકડથી દૂર છે. આ તમામ આરોપીઓ રાજકોટ શહેરના 150 ફૂટ રીંગ રોડ પર આવેલા આલ્ફા પ્લસ કોમ્પલેક્ષમાં કોલ સેન્ટર ચલાવતા હતા. જેમની પાસેથી લેપટોપ, કોમ્પ્યુટર, હેડફોન સહિત કુલ ત્રણ લાખથી વધુનો મુદ્દામાલ કબજે કરવામાં આવ્યો છે.
