થર્ટી ફર્સ્ટની રંગીન રાત પહેલા રંગીલા રાજકોટમાંથી ટ્રક ભરીને દારૂ ઝડપાયો

આગામી દિવસોમાં 31 આવી રહી છે. વર્ષ 2018ના છેલ્લા દિવસની ઉજવણી માટે ઠેરઠેર પાર્ટીઓના આયોજન થઇ રહ્યા છે. ત્યાર આ તકનો લાભ લઇને દારૂના રસિયાઓ પણ દારૂની પાર્ટીઓનું આયોજન કરે એમાં નવાઇ નથી. સામે આવતી થર્ટી ફર્સ્ટની રાત્રે દારૂની મહેફિલો માટે લઇ જવાતો લાખો રૂપિયાનો દારૂ રાજકોટ પોલીસ ઝડપી પાડ્યો છે. રાજકોટના ભગવતીપરા વિસ્તારમાં પોલીસે મંગળવારે રાત્રે દરોડો પાડી 600થી વધુ દારૂની પેટી ભરેલો રાજસ્થાન પાર્સિંગનો ટ્રક ઝડપી લીધો હતો. પોલીસને જોતા પાંચ જેટલા બૂટલેગરો નાસી ગયા હતા. (અંકિત પોપટ, રાજકોટ)

મળતી માહિતી પ્રમાણે ભગવતીપરાની ભાગોળે પડતર જમીન પર દારૂનું કટિંગ થઇ રહ્યાની હકીકત મળતાં ક્રાઇમ બ્રાંચના પીઆઇ એચ.એમ.ગઢવી, પીએસઆઇ કાનમિયા, પીએસઆઇ ઉનડકટ સહિતની ટીમ દોડી ગઇ હતી.

પોલીસવેન જોતા જ બૂટલેગરોમાં નાસભાગ મચી ગઇ હતી. પાંચ જેટલા શખ્સ નાસી છૂટ્યા હતા. પોલીસે સ્થળ પર પડેલા ટ્રક (ટ્રેલર)ની તલાશી લેતા શરૂઆતમાં તો સૂકાઘાસનો જથ્થો મળ્યો હતો.

ટ્રકમાં ઘાસ હશે તેવું પોલીસને પ્રાથમિક દૃષ્ટિએ લાગ્યું હતું, પરંતુ હકીકત સાચી મળી હોવાની ખાતરીએ ઘાસ ભરેલા કોથળા દૂર કરતાં જ દારૂની પેટીનો જથ્થો મળી આવ્યો હતો.

પોલીસે ચાવી બનાવતા સરદારજી યુવકને સ્થળ પર બોલાવ્યો હતો અને તેની પાસે ડુપ્લિકેટ ચાવી બનાવી ટ્રક ચાલુ કરાવ્યો હતો.

અને દારૂ-ટ્રક પોલીસ સ્ટેશને લઇ જવાયો હતો. પીઆઇ ગઢવીએ જણાવ્યું હતું કે, 600થી વધુ પેટી દારૂનો જથ્થો હોવાનું અનુમાન છે.

પોલીસે આ અંગે બુટલેગરો સામે ગુનો નોંધીને વધુ તપાસ હાથધરી હતી.